శ్రీనువైట్ల దర్శకత్వంలో మూడు విభిన్నమైన పాత్రలతో ట్రిపుల్ రోల్‌కు రెడీ అవుతున్నాడు రవితేజ. ఈ సినిమాలో ఓ మలయాళ భామను హీరోయిన్‌గా ఎంపిక చేశారట.

గత రెండేళ్లుగా తెలుగులో మలయాళ భామల జోరు బాగా కనిపిస్తోంది. ఇబ్బడి ముబ్బడిగా సినిమాలు కమిట్ అవకుండా సెలక్టివ్‌గా సినిమాలు ఎంచుకుంటూ తమ కెరీర్‌ను మలచుకుంటున్నారు ఈ కేరళ బ్యూటీస్. నివేదా థామస్ కెరీరే ఇందుకు పక్కా నిదర్శనం. తెలుగులో తొలిచిత్రం 'జెంటిల్ మేన్' మొదలు ఆచితూచి అడుగులేస్తోన్న నివేద.. 'జై లవకుశ' తర్వాత మరో సినిమా కమిట్ అవలేదు. అయితే తాజాగా ఈ ముద్దుగుమ్మకు రవితేజ సరసన నటించే ఛాన్స్ వచ్చిందట. రవితేజ అప్ కమింగ్ మూవీలో నివేదను హీరోయిన్‌గా సంప్రదిస్తున్నట్టు తెలుస్తోంది.

రవితేజ హీరోగా శ్రీనువైట్ల దర్శకత్వంలో ఓ సినిమా రూపొందబోతోంది. మైత్రి మూవీ మేకర్స్ సంస్థ నిర్మించే ఈ సినిమాకు 'అమర్-అక్బర్-ఆంథోని' అనే టైటిల్ పరిశీలనలో ఉంది. రవితేజ త్రిపాత్రాభినయం చేస్తోన్న ఈ సినిమాలో కాజల్ అగర్వాల్ ఓ హీరోయిన్‌గా కాగా.. మరో హీరోయిన్ పాత్రకు నివేదా థామస్‌ను సంప్రదిస్తున్నారట. నిజానికి ఆ మధ్య రవితేజ 'నేల టికెట్' మూవీలో నివేదాకు ఛాన్స్ వచ్చింది. అప్పట్లో లైట్ తీసుకున్న ఈ బ్యూటీకి ఇప్పుడు మరోసారి అదే హీరోతో అవకాశం రావడం విశేషం. ఈ సారి మాత్రం ఈ కాంబినేషన్ సెట్ అవడం ఖాయమంటున్నారు. అయితే చిత్రయూనిట్ నుంచి అధికారిక ప్రకటన రావాల్సి ఉంది. మరి తారక్ తరహాలో రవితేజతోనూ నివేద హిట్ అందుకుంటుందేమో చూడాలి..!