અમેરિકાએ Student Visa રિજેક્ટ કરવાનો રેકોર્ડ કર્યોઃ 36 ટકા વિઝા અરજીઓ ફગાવી

US Student Visa Rejection: અમેરિકાના સ્ટુડન્ટ વિઝાની ડિમાન્ડ સૌથી વધારે જોવા મળે છે, પરંતુ તેની સામે વિઝા રિજેક્શનનું પ્રમાણ પણ ઉંચું છે. લેટેસ્ટ આંકડા દર્શાવે છે કે વર્ષ 2023માં અમેરિકાએ રેકોર્ડ સંખ્યામાં સ્ટુડન્ટ વિઝાની અરજીઓ ફગાવી છે. આખા વર્ષ દરમિયાન અમેરિકાએ લગભગ 36 ટકા જેટલી અરજીઓ રિજેક્ટ કરી હતી. બાકીના નોન-ઈમિગ્રન્ટ વિઝા અરજીઓની સાથે સરખામણી કરવામાં આવે તો 2021થી 2023 વચ્ચે સ્ટુડન્ટ વિઝાની અરજી રિજેક્ટ કરવાનું પ્રમાણ લગભગ ડબલ હતું.

વર્ષ 2020માં કોવિડના કારણે અમેરિકાના સ્ટુડન્ટ વિઝાની સંખ્યા ઘટી ગઈ હતી, પરંતુ ત્યાર પછી કુલ વિઝા ઈશ્યૂમાં મોટો વધારો થયો છે. છેલ્લા ત્રણ વર્ષથી વિઝા ઈશ્યૂ કરવાનું પ્રમાણ વધતું જાય છે. તેની સામે રિજેક્શન પણ મોટા પ્રમાણમાં વધે છે. અમેરિકાએ 2015માં સૌથી વધારે સ્ટુડન્ટ વિઝા ઈશ્યૂ કર્યા હતા. તે સમયે માત્ર 15 ટકા વિઝા અરજીઓ રિજેક્ટ થતી હતી, પરંતુ હવે 36 ટકાથી વધારે એપ્લિકેશનને રિજેક્ટ કરવામાં આવે છે. કેનેડા, યુકે અને ઓસ્ટ્રેલિયા જેવા દેશો ઈન્ટરનેશનલ સ્ટુડન્ટની સંખ્યાને અંકુશમાં રાખવા માટે પ્રયાસ કરે છે જ્યારે અમેરિકા વિદેશી સ્ટુડન્ટને હજુ આકર્ષે છે.

પરંતુ અમેરિકાની તકલીફ એ છે કે તેની ઈમિગ્રેશન સિસ્ટમ બહુ આઉટડેટેડ છે અને જમાના સાથે તાલ મિલાવી શકતી નથી. અન્ય દેશોમાં ઓસ્ટ્રેલિયાએ 2023માં 34 ટકા વિઝા અરજીઓને રિજેક્ટ કરી હતી. યુકેમાં પણ વિઝા રિજેક્શનનું પ્રમાણ ઊંચું છે. અમેરિકાએ લગભગ 2.53 લાખ વિઝા અરજીઓને નકારી કાઢી છે. તેના કારણે એવી ટીકા કરવામાં આવે છે કે અમેરિકા એક મહત્ત્વની આર્થિક અને સાંસ્કૃતિક તક ચૂકી ગયું છે. જોકે, એક્સપર્ટનું માનવું છે કે અમેરિકાએ આટલા બધા વિઝા રિજેક્ટ કર્યા તેમાં કોઈ આશ્ચર્ય નથી. કેનેડા અને ઓસ્ટ્રેલિયા જેવા દેશોએ પણ સ્ક્રુટિની વધારી દીધી છે.

વિઝા સિસ્ટમને વધુ ચૂસ્ત બનાવવામાં આવી છે કારણ કે વિઝાના ફ્રોડ અટકાવવા માટે તે જરૂરી છે. સ્ટુડન્ટ વિઝા રિજેક્ટ કરવાનું કોઈ ચોક્કસ કારણ જણાવાયું નથી. પરંતુ એક્સપર્ટ માને છે કે વિઝાની અરજી કરનારાઓ પોતાનો નોન-ઈમિગ્રન્ટ ઈરાદો સાબિત કરી શકતા નથી તેથી અરજીઓ રિજેક્ટ થાય છે. લોકોએ સાબિત કરવાનું હોય છે કે તેઓ પોતાના દેશ સાથે મજબૂત જોડાણ ધરાવે છે અને તેથી અમેરિકામાં એજ્યુકેશન લીધા પછી પોતાના દેશ પરત જતા રહેશે. કોન્સ્યુલેટના અધિકારીઓને લાગે કે અરજી કરનાર વ્યક્તિ વિઝા પછી પણ અમેરિકામાં રોકાઈ જશે, ત્યારે તે અરજીને રિજેક્ટ કરે છે.

કોન્સ્યુલર અધિકારીઓને ખબર હોય છે કે ઘણા દેશોમાં વિઝાના નામે ફ્રોડ થાય છે અને લોકો ખોટા કારણો આપીને અરજી કરતા હોય છે. તેથી તેઓ વિઝા એપ્રૂવલમાં બહુ કાળજી રાખે છે. આ ઉપરાંત વિઝા ઈન્ટરવ્યૂની પદ્ધતિ સામે પણ સવાલ પેદા થયા છે. કેટલીક વખત તો બે મિનિટ કરતા પણ ઓછો ઈન્ટરવ્યૂ લેવાય છે અને તેમાં સ્ટુડન્ટ વિઝા રિજેક્ટ કરી દેવામાં આવે છે. વિઝા અરજીઓ રિજેક્ટ કરવાના કારણે અમેરિકાએ ભારે નુકસાન પણ વેઠવું પડે છે. 2.53 લાખ સ્ટુડન્ટની અરજીઓ રિજેક્ટ કરવામાં આવી. તેનો અર્થ એ થયો કે આ વિદ્યાર્થીઓએ માથાદીઠ 30 હજાર ડોલરની ટ્યુશન ફી અને બીજો ખર્ચ કર્યો હોત.

કુલ મળીને અમેરિકન ઈકોનોમીને 7.60 અબજ ડોલરનો ફાયદો થતો અટકી ગયો. સ્ટુડન્ટ ચાર વર્ષ સુધી અમેરિકામાં રહે તો ઈકોનોમીને 30.5 અબજ ડોલરનો ફાયદો થાય. પરંતુ વિઝા અરજી રિજેક્ટ કરવાના કારણે આ ફાયદો ગુમાવવો પડ્યો છે.