કેનેડામાં 22 મિલિયન ડોલરના ગોલ્ડની લૂંટમાં બે ભારતીયો સહિત છ ઝડપાયા

કેનેડાના ઈતિહાસની સૌથી મોટી લૂંટમાં બે ભારતીય મૂળના લોકો સહિત કુલ છ લોકોની ધરપકડ કરવામાં આવી છે. ટોરેન્ટોના મેઈન એરપોર્ટની સ્ટોરેજ ફેસેલિટીમાં એપ્રિલ 2023માં થયેલી આ લૂંટમાં સોનાની લગડીઓ તેમજ ફોરે કરન્સી ભરેલું આખું કન્ટેનર લૂંટારા ઉડાવી ગયા હતા, જેમાં ભરેલા કિંમતી સામાનની વેલ્યૂ 22 મિલિયન કેનેડિયન ડોલર જેટલી થતી હતી. આ કન્ટેનર સ્વિટઝર્લેન્ડના ઝુરિકથી બાય એર કેનેડાના ટોરેન્ટોના પિઅર્સન ઈન્ટરનેશનલ એરપોર્ટ પર લેન્ડ થયું હતું.

આ કેસની પોલીસ ફરિયાદ અનુસાર એર કેનેડાના બે ભૂતપૂર્વ કર્મચારીઓએ આ લૂંટમાં આરોપીઓની મદદ કરી હતી, જેમાંથી એક હાલ પોલીસની કસ્ટડીમાં છે જ્યારે બીજાની સામે અરેસ્ટ વોરન્ટ ઈશ્યૂ કરવાની કામગીરી ચાલી રહી છે. બુધવારે આ મામલે કેનેડિયન પોલીસે જે છ લોકોની ધરપકડ કરી હતી તેમાં પરમપાલ સિંધુ અને અમિત જલોટાનો સમાવેશ થાય છે. આ બંને મૂળ ભારતીય છે અને કેનેડાના ઓન્ટારિયોમાં રહે છે, તેમના સિવાય કેનેડિયન પોલીસે અમ્માદ ચૌધરી, અલી રઝા, પ્રસાદ પારામલિંગમ નામના આરોપીઓ સામે પણ વોરંટ ઈશ્યૂ કરાવ્યું છે.22 મિલિયન કેનેડિયન ડોલરના ગોલ્ડ અને ફોરેન કરન્સીની આ લૂંટને અંજામ આપનારા ભેજાબાજોને પકડવા માટે કેનેડિયન પોલીસે બીજા દેશની પોલીસની પણ મદદ કરી હતી, અને ખાસ્સી જહેમત બાદ લૂંટારાની ઓળખ પ્રસ્થાપિત કરી શકાઈ હતી.

કેનેડાની પીલ પોલીસે સિમરન પ્રીત પાનેસર, અર્ચિત ગ્રોવર અને અરસલન ચૌધરી સામે પણ આ લૂંટમાં કથિત સંડોવણી બદલ વોરન્ટ ઈશ્યૂ કર્યા હતા. એર કેનેડાએ પણ એક સમયે લૂંટમાં સામેલ સિધુ અને પાનેસર પોતાના કર્મચારીઓ હોવાનું કન્ફર્મ કર્યું હતું, પરંતુ તેમાંથી એક આરોપીએ તેની અરેસ્ટ થાય તે પહેલા જ જોબ છોડી દીધી હતી, જ્યારે બીજાને તપાસ પૂરી ના થાય ત્યાં સુધી સસ્પેન્ડ કરવામાં આવ્યો હતો. આ કેસના મુખ્ય તપાસ અધિકારી માઈક માવિટીએ ટોરેન્ટોના એરપોર્ટ પર થયેલી લૂંટને કેનેડાના ઈતિહાસની સૌથી મોટી લૂંટ ગણાવતા કહ્યું હતું કે એર કેનેડાના કર્મચારીની મદદથી જ આ સમગ્ર કાવતરૂં પાર પાડવામાં આવ્યું હતું.કેનેડાની પોલીસે એક આરોપીની અમેરિકાથી પણ ધરપકડ કરી હતી..

લૂંટ કરનારા આરોપીઓ પાસે કેટલાક મોડિફાઈડ હથિયારો પણ હતા. પોલીસને લૂંટવામાં આવેલું કેટલુંક ગોલ્ડ પણ જપ્ત કરવામાં સફળતા મળી છે, જોકે ઘણું સોનું લૂંટારાએ ઓગાળી દીધું હોવાની પણ આશંકા છે, કારણકે આ કેસની તપાસ દરમિયાન ગોલ્ડ ઓગાળવાના સાધનો પણ પોલીસને મળી આવ્યા હતા. જે કન્ટેનરને લૂંટારા ઉઠાવી ગયા હતા તેમાં 6600 ગોલ્ડ બાર્સ હતા, જેમનું વજન 800 પાઉન્ડથી પણ વધારે થતું હતું અને તેમની માર્કેટ વેલ્યૂ 20 મિલિયન ડોલરથી વધુ હતી. આ સિવાય તે કન્ટેનરમાં 2.5 મિલિયન ડોલરની વેલ્યૂ ધરાવતી ફોરેન કરન્સી હતી.

આ કેસની તપાસની શરૂઆતમાં જ પાંચ શકમંદોને ઝડપી લેવામાં આવ્યા હતા, પરંતુ તે તમામને કોર્ટમાં હાજર રહેવાની શરતે જામીન પર છોડી દેવાયા હતા. આ લૂંટને 17 એપ્રિલ 2023ના રોજ અંજામ આપવામાં આવ્યો હતો, જેમાં સ્વિટ્ઝર્લેન્ડથી આવેલા કન્ટેનરને એરક્રાફ્ટમાંથી ઉતારીને કાર્ગો ફેસિલિટીમાં લઈ જવાયું હતું પરંતુ તેને તેની નિશ્ચિત જગ્યા પર પહોંચાડાય તે પહેલા જ લૂંટારા કાર્ગો ફેસિલિટીમાં પહોંચી ગયા હતા અને તેમણે તેમાંથી સામાન કાઢીને ડિલિવરી ટ્રકમાં ચઢાવી દીધો હતો ત્યારબાદ તેઓ કોઈને જરા સરખો પણ અણસાર ના આવે તે રીતે આ ટ્રકને લઈને રફુચક્કર થઈ ગયા હતા.