ಜಬರ್ದಸ್ತ್ ಆಗಿ ಬಿಡುಗಡೆಯಾಗಿದೆ 2024 ಪಲ್ಸರ್ ಎನ್ 250 : ಇಲ್ಲಿದೆ ಬೆಲೆ, ವೈಶಿಷ್ಟ್ಯಗಳ ಡೀಟೇಲ್ಸ್

ಬಜಾಜ್ ಆಟೋ ತನ್ನ ಬಹುನಿರೀಕ್ಷಿತ 2024 ಪಲ್ಸರ್ ಎನ್‌ 250 ಅನ್ನು ಭಾರತದ ವಾಹನ ಮಾರುಕಟ್ಟೆಯಲ್ಲಿ ಬಿಡುಗಡೆ ಮಾಡಿದೆ. ಹಲವು ನವೀಕರಣಗಳೊಂದಿಗೆ ಜಬರ್‌ದಸ್ತ್ ಆಗಿ ಎಂಟ್ರಿ ಕೊಟ್ಟಿರುವ ಈ ಬೈಕ್‌ನ ಆರಂಭಿಕ ಎಕ್ಸ್ ಶೋರೂಮ್ ಬೆಲೆ 1.51 ಲಕ್ಷ ರೂಪಾಯಿ. ಸದ್ಯ ಇರುವ ಮಾದರಿಯಲ್ಲಿ ಹಾರ್ಡ್‌ವೇರ್ ಮತ್ತು ವೈಶಿಷ್ಟ್ಯದ ನವೀಕರಣಗಳನ್ನು ಒಳಗೊಂಡಂತೆ ಈ ಮೋಟಾರ್‌ಸೈಕಲ್ ಹಲವಾರು ನವೀಕರಣಗಳನ್ನು ಪಡೆದುಕೊಂಡಿದೆ.

ಗ್ಲೋಸಿ ರೇಸಿಂಗ್ ರೆಡ್, ಬ್ರೂಕ್ಲಿನ್ ಬ್ಲಾಕ್ ಮತ್ತು ಪರ್ಲ್ ಮೆಟಾಲಿಕ್ ವೈಟ್ ಹೀಗೆ ಮೂರು ಬಣ್ಣದ ಆಯ್ಕೆಯಲ್ಲಿ ಈ ಬೈಕ್ ಲಭ್ಯವಿದೆ. 2024 ಪಲ್ಸರ್ ಎನ್‌ 250 ನ ಅತಿ ದೊಡ್ಡ ಹೈಲೈಟ್‌ಗಳಲ್ಲಿ ಡಿಜಿಟಲ್ ಇನ್ಸ್ಟ್ರುಮೆಂಟ್ ಕನ್ಸೋಲ್ ಪ್ರಮುಖವಾದದ್ದು. ಇದು ಬ್ಲೂಟೂತ್ ಸಂಪರ್ಕವನ್ನು ಹೊಂದಿದೆ. ಸವಾರರು ಈಗ ಕರೆ ಮತ್ತು ಎಸ್‌ಎಂಎಸ್ ಅಲರ್ಟ್, ಟರ್ನ್-ಬೈ-ಟರ್ನ್ ನ್ಯಾವಿಗೇಷನ್ ಮತ್ತು ಸ್ಪೀಡೋಮೀಟರ್, ಓಡೋಮೀಟರ್, ಇಂಧನ ಮಟ್ಟ, ಮೈಲೇಜ್ ಸೇರಿದಂತೆ ಸಾಕಷ್ಟು ಮಾಹಿತಿಯನ್ನು ಇದರಿಂದ ಪಡೆಯಬಹುದು. ಹೆಚ್ಚುವರಿಯಾಗಿ ಎನ್‌ 250 ಟ್ರಾಕ್ಷನ್ ಕಂಟ್ರೋಲ್ ಅನ್ನು ಹೊಂದಿದೆ.

ಈ ವೈಶಿಷ್ಟ್ಯವನ್ನು ಹೊಂದಿರುವ ಮೊದಲ ಪಲ್ಸರ್ ಮಾದರಿ ಇದಾಗಿದೆ. ಇನ್ನು ವಿನ್ಯಾಸದ ಬಗ್ಗೆ ನೋಡುವುದಾದರೆ ಈ ಬೈಕ್ ಬಹುತೇಕ ಹಿಂದಿನ ಮಾದರಿಯಂತೆ ಇದ್ದರೂ ಒಂದಷ್ಟು ನವೀಕರಿಸಿದ ಗ್ರಾಫಿಕ್ಸ್ ಅನ್ನು ಪಡೆಯುತ್ತದೆ. ಜೊತೆಗೆ ಇದು ಯುಎಸ್‌ಬಿ ಚಾರ್ಜಿಂಗ್ ಸ್ಲಾಟ್, ಎಲ್‌ಇಡಿ ಪ್ರೊಜೆಕ್ಟರ್ ಹೆಡ್‌ಲ್ಯಾಂಪ್ ಜೊತೆಗೆ ಅಗ್ರೆಸ್ಸಿವ್ ಆಗಿ ಕಾಣುವ ಎಲ್‌ಇಡಿ ಡಿಆರ್‌ಎಲ್‌ಗಳನ್ನೂ ಹೊಂದಿದೆ. ಹಿಂಭಾಗದಲ್ಲಿ ನಯವಾದ ಎಲ್ಇಡಿ ಯುನಿಟ್ ಅನ್ನೂ ಈ ಬೈಕ್‌ನಲ್ಲಿ ನೋಡಬಹುದು. ಇನ್ನು ಈ ಬೈಕ್ ಸಾಕಷ್ಟು ಹಾರ್ಡ್‌ವೇರ್ ಅಪ್‌ಡೇಟ್‌ಗಳನ್ನು ಪಡೆದುಕೊಂಡಿದೆ. ಹೊಸ ಎನ್ 250 ಈಗಾಗಲೇ ಇರುವ ಮಾದರಿಯಲ್ಲಿರುವ ಟೆಲಿಸ್ಕೋಪಿಕ್ ಫ್ರಂಟ್ ಫೋರ್ಕ್‌ಗಳ ಬದಲಾಗಿ ಷಾಂಪೇನ್ ಗೋಲ್ಡ್‌ ಯುಎಸ್‌ಡಿ ಫೋರ್ಕ್‌ಗಳನ್ನು ಪಡೆದುಕೊಂಡಿದೆ.

ಹಿಂಭಾಗದಲ್ಲಿ ಮೊನೊಶಾಕ್ ಯುನಿಟ್‌ ಅನ್ನೇ ಈ ಬೈಕ್ ಕೂಡಾ ಮುಂದುವರಿಸಿದೆ. ಇನ್ನು ಈ ಬೈಕ್ ಡ್ಯುಯಲ್-ಚಾನೆಲ್ ಎಬಿಎಸ್‌ ಜೊತೆಗೆ 300 ಎಂಎಂ ಮುಂಭಾಗ ಹಾಗೂ 230 ಎಂಎಂ ಹಿಂಭಾಗದ ಪೆಟಲ್ ಡಿಸ್ಕ್ ಬ್ರೇಕ್‌ಗಳನ್ನು ಪಡೆಯುತ್ತದೆ. ರೋಡ್‌, ರೈನ್ ಹಾಗೂ ಆಫ್‌ರೋಡ್ ಹೀಗೆ ಮೂರು ರೈಡ್ ಮೋಡ್‌ಗಳನ್ನು ಪಡೆಯುತ್ತದೆ. ಇನ್ನು ಈ ಬೈಕ್‌ನ ಎಂಜಿನ್ ಬಗ್ಗೆ ನೋಡುವುದಾದರೆ 2024 ಪಲ್ಸರ್ ಎನ್ 250 ಬೈಕ್ 249 ಸಿಸಿ, ಸಿಂಗಲ್-ಸಿಲಿಂಡರ್, ಆಯಿಲ್-ಕೂಲ್ಡ್ ಎಂಜಿನ್‌ನಿಂದ ಶಕ್ತಿ ಪಡೆಯುತ್ತದೆ. ಈ ಎಂಜಿನ್ 24.1 ಬಿಎಚ್‌ಪಿ ಶಕ್ತಿ ಹಾಗೂ 21.5 ಎನ್‌ಎಂ ಟಾರ್ಕ್ ಅನ್ನು ಹೊರಹಾಕುತ್ತದೆ. ಈ ಎಂಜಿನ್ ಐದು-ಸ್ಪೀಡ್ ಗೇರ್‌ಬಾಕ್ಸ್‌ನೊಂದಿಗೆ ಜೋಡಿಯಾಗಿ ಬರುತ್ತದೆ.

ಜೊತೆಗೆ ಅಸಿಸ್ಟ್‌ ಮತ್ತು ಸ್ಲಿಪ್ಪರ್ ಕ್ಲಚ್ ಅನ್ನೂ ಇದು ಹೊಂದಿದೆ.