Ather Rizta: ಎಥರ್ ರಿಜ್ಟಾ ಫ್ಯಾಮಿಲಿ ಎಲೆಕ್ಟ್ರಿಕ್ ಸ್ಕೂಟರ್ ಬಿಡುಗಡೆ: ಎಷ್ಟಿದೆ ಬೆಲೆ, ರೇಂಜ್? : ಇಲ್ಲಿದೆ ಡೀಟೇಲ್ಸ್

ಬೆಂಗಳೂರು ಮೂಲದ ಎಲೆಕ್ಟ್ರಿಕ್ ವಾಹನ ತಯಾರಿಕಾ ಸಂಸ್ಥೆ ಎಥರ್ ಎನರ್ಜಿ ತನ್ನ ಬಹುನಿರೀಕ್ಷಿತ ಫ್ಯಾಮಿಲಿ ಎಲೆಕ್ಟ್ರಿಕ್ ಸ್ಕೂಟರ್ ಅನ್ನು ಬಿಡುಗಡೆ ಮಾಡಿದೆ. ಈಗಾಗಲೇ ಸಾಕಷ್ಟು ನಿರೀಕ್ಷೆ ಮೂಡಿಸಿರುವ ರಿಜ್ಟಾ ಎಲೆಕ್ಟ್ರಿಕ್ ಸ್ಕೂಟರ್ ಅದ್ಧೂರಿಯಾಗಿ ಎಂಟ್ರಿ ಕೊಟ್ಟಿದೆ. ಸುದೀರ್ಘ ಕಾಯುವಿಕೆಯ ನಂತರ ಈ ಎಲೆಕ್ಟ್ರಿಕ್ ಸ್ಕೂಟರ್‌ ಅನ್ನು ಆರಂಭಿಕ ಎಕ್ಸ್‌ ಶೋರೂಮ್ ಬೆಲೆ 1.10 ಲಕ್ಷ ರೂಪಾಯಿಗೆ ಬಿಡುಗಡೆ ಮಾಡಲಾಗಿದೆ.

ಬೆಂಗಳೂರಿನಲ್ಲಿ ಎಥರ್ ಕಮ್ಯೂನಿಟಿ ಡೇ 2024 ರ ಸಂದರ್ಭದಲ್ಲಿ ಎಥರ್ ರಿಜ್ಟಾವನ್ನು ಬಿಡುಗಡೆ ಮಾಡಲಾಗಿದೆ.ಹೊಸ ರಿಜ್ಟಾ ಮೂರು ರೂಪಾಂತರಗಳಲ್ಲಿ ಎರಡು ಬ್ಯಾಟರಿ ಆಯ್ಕೆಗಳೊಂದಿಗೆ ಸಿಗಲಿದೆ. 2.9 kWh ಬ್ಯಾಟರಿಯೊಂದಿಗೆ ರಿಜ್ಟಾ ಎಸ್ ಮತ್ತು ರಿಜ್ಟಾ ಝಡ್ ಹಾಗೂ 3.7 kWh ಬ್ಯಾಟರಿಯೊಂದಿಗೆ ಟಾಪ್-ಎಂಡ್ ಮಾಡೆಲ್ ರಿಜ್ಟಾ ಝಡ್ ಸಿಗಲಿದೆ. ಇದರೊಂದಿಗೆ ಕಂಪನಿಯು ಹ್ಯಾಲೊ ಬ್ರಾಂಡ್‌ನ ಎರಡು ಹೆಲ್ಮೆಟ್‌ಗಳನ್ನೂ ಬಿಡುಗಡೆ ಮಾಡಿದೆ. ಇದರಲ್ಲಿ ಹ್ಯಾಲೊ ಸ್ಮಾರ್ಟ್ ಹೆಲ್ಮೆಟ್, ಸ್ಪೀಕರ್ ಮತ್ತು ಬ್ಲೂಟೂತ್ ಸಂಪರ್ಕವನ್ನು ಹೊಂದಿದೆ. ಈ ಸ್ಕೂಟರ್ ಎಥರ್ 450 ಸರಣಿಗಿಂತ ಭಿನ್ನವಾಗಿದ್ದು ಬಾಕ್ಸಿ ನೋಟವನ್ನು ಪಡೆಯುತ್ತದೆ. ಇದು ನಯವಾದ, ಆಯತಾಕಾರದ ಎಲ್‌ಇಡಿ ಹೆಡ್‌ಲ್ಯಾಂಪ್ ಯುನಿಟ್‌ಗಳನ್ನು ಮುಂಭಾಗದಲ್ಲಿ ಹೊಂದಿದ್ದು, ಹಿಂಭಾಗದಲ್ಲಿ ತೆಳುವಾದ ಲೈಟ್ ಬಾರ್‌ಗಳನ್ನು ಹೊಂದಿದೆ.

ಬೇಸ್ ಮಾದರಿ ರಿಜ್ಟಾ ಎಸ್‌ ಎಕ್ಸ್‌ ಶೋರೂಮ್ ಬೆಲೆ 1.10 ಲಕ್ಷ ರೂಪಾಯಿಯಲ್ಲಿ ಸಿಗುತ್ತದೆ. ಹೆಚ್ಚುವರಿ ವೈಶಿಷ್ಟ್ಯಗಳು ಹಾಗೂ ಬಣ್ಣದ ಆಯ್ಕೆಯನ್ನು ಬಯಸುವವರಿಗೆ ರಿಜ್ಟಾ ಝಡ್‌ ವೇರಿಯೆಂಟ್ ಎಕ್ಸ್‌ ಶೋರೂಮ್ ಬೆಲೆ 1.25 ಲಕ್ಷ ರೂಪಾಯಿಗೆ ಲಭ್ಯವಿದೆ. ಇಲ್ಲದೆ, ಇನ್ನೂ ಹೆಚ್ಚಿನ ವೈಶಿಷ್ಟ್ಯ, ಬ್ಯಾಟರಿ ಪ್ಯಾಕ್ ಅನ್ನು ಹುಡುಕುವವರಿಗೆ ಟಾಪ್ ಎಂಡ್ ಮಾಡೆಲ್ ರಿಜ್ಟಾ ಝಡ್‌ ಎಕ್ಸ್‌ ಶೋರೂಮ್ ಬೆಲೆ 1.45 ಲಕ್ಷ ರೂಪಾಯಿಗೆ ಲಭಿಸಲಿದೆ. ಇನ್ನು 2.9 kWh ಬ್ಯಾಟರಿ ಪ್ಯಾಕ್ ರಿಜ್ಟಾಗೆ 123 ಕಿಮೀ ವ್ಯಾಪ್ತಿಯನ್ನು ತಯಾರಕರು ಹೇಳಿಕೊಳ್ಳುತ್ತಾರೆ. ಇದರ ರಿಯಲ್ -ವರ್ಲ್ಡ್‌ ರೇಂಜ್ 105 ಕಿಮೀ. ಇನ್ನು 3.7 kWh ಯೂನಿಟ್‌ಗೆ ಕ್ಲೈಮ್ ಮಾಡಲಾದ ವ್ಯಾಪ್ತಿಯು 160 ಕಿಮೀ, ಇದರ ರಿಯಲ್ -ವರ್ಲ್ಡ್‌ ರೇಂಜ್ 125 ಕಿಮೀ. ಈ ಎಲ್ಲಾ ವೇರಿಯೆಂಟ್‌ಗಳ ಟಾಪ್ ಸ್ಪೀಡ್ 80 kmph ಆಗಿದೆ. ಹೆಚ್ಚುವರಿಯಾಗಿ ರಿಜ್ಟಾ ಎಸ್‌ ಮೂರು ಮೊನೊಟೋನ್ ಬಣ್ಣಗಳಲ್ಲಿ ಬಂದರೆ, ರಿಜ್ಟಾ ಝಡ್‌ ಮೂರು ಮೊನೊಟೋನ್ ಹಾಗೂ ನಾಲ್ಕು ಡ್ಯುಯೆಲ್ ಟೋನ್ ಆಯ್ಕೆಗಳು ಒಳಗೊಂಡಂತೆ ಏಳು ಬಣ್ಣದ ಆಯ್ಕೆಗಳಲ್ಲಿ ಸಿಗುತ್ತದೆ. ಇದಲ್ಲದೆ ಈ ಇವಿ ಝೀಪ್ ಹಾಗೂ ಸ್ಮಾರ್ಟ್‌ ಇಕೋ ಎಂಬ ಎರಡು ರೈಡಿಂಗ್ ಮೋಡ್‌ಗಳನ್ನು ಸ್ಟ್ಯಾಂಡರ್ಡ್‌ ಆಗಿ ಪಡೆಯುತ್ತದೆ. ಸುರಕ್ಷತೆಯ ದೃಷ್ಟಿಯಿಂದ ಟ್ರಾಕ್ಟನ್ ಕಂಟ್ರೋಲ್, ಸ್ಕಿಡ್ ಕಂಟ್ರೋಲ್ ಸಿಸ್ಟಮ್, ಎಮರ್ಜೆನ್ಸಿ ಸ್ಟಾಪ್ ಸಿಗ್ನಲ್‌, ಥೆಪ್ಟ್‌ ಮತ್ತು ಟೋ ಡಿಟೆಕ್ಟ್‌ ಸೇರಿದಂತೆ ಹಲವಾರು ವೈಶಿಷ್ಟ್ಯಗಳನ್ನು ಈ ಸ್ಕೂಟರ್ ಒಳಗೊಂಡಿದೆ. ಇದಲ್ಲದೆ ಮ್ಯಾಜಿಕ್ ಟ್ವಿಸ್ಟ್, ಆಟೋ ಹೋಲ್ಡ್ ಮತ್ತು ರಿವರ್ಸ್ ಮೋಡ್‌ನಂತಹ ರೈಡ್ ಅಸಿಸ್ಟ್ ವೈಶಿಷ್ಟ್ಯಗಳೂ ಇದರಲ್ಲಿ ಇವೆ. ಅಲ್ಲದೆ, ಬೇಸ್- ಮಾದರಿಯು 7-ಇಂಚಿನ ಎಲ್‌ಸಿಡಿ ಡಿಸ್ಪ್ಲೇಯನ್ನು ಪಡೆಯುತ್ತದೆ ಮತ್ತು ಇತರ ಎರಡು ಮಾದರಿಗಳು 7-ಇಂಚಿನ ಟಿಎಫ್‌ಟಿ ಡಿಸ್ಪ್ಲೇಗಳನ್ನು ಪಡೆಯುತ್ತದೆ. ಇನ್ನು 34-ಲೀಟರ್ ಅಂಡರ್ ಸೀಟ್ ಬೂಟ್ ಸೇರಿದಂತೆ 56-ಲೀಟರ್ ಸ್ಟೋರೇಜ್ ಸ್ಪೇಸ್ ಮತ್ತು ಐಚ್ಛಿಕ 22-ಲೀಟರ್ ಫ್ರಂಕ್ ಅಕ್ಸೆಸೆರೀಸ್‌ ಕೂಡಾ ಸೇರಿವೆ. ಈ ಸ್ಕೂಟರ್ ಬಿಡುಗಡೆಯ ಜೊತೆಗೆ ಕಂಪನಿ ಎಥರ್ ಹ್ಯಾಲೊ ಹೆಲ್ಮೆಟ್‌ಗಳನ್ನು ಪರಿಚಯಿಸಿದೆ. ಇದರಲ್ಲಿ ಹ್ಯಾಲೊ ಬಿಟ್ ಬೆಲೆ 4,999 ರೂಪಾಯಿ ಹಾಗೂ ಹಾಲೋ ಬೆಲೆ 14,999 ರೂಪಾಯಿ. ಇನ್ನು ಮುಂಗಡ-ಆರ್ಡರ್‌ಗಳಿಗೆ ಬೆಲೆಯಲ್ಲಿ ರಿಯಾಯಿತಿ ಕೂಡಾ ಲಭ್ಯವಿದೆ.ಎಥರ್ ಎನರ್ಜಿಯ ಹೊಸ ಫ್ಯಾಮಿಲಿ ಎಲೆಕ್ಟ್ರಿಕ್ ಸ್ಕೂಟರ್ ರಿಜ್ಟಾ ನೋಟ ಮತ್ತು ವಿನ್ಯಾಸದ ದೃಷ್ಟಿಯಿಂದ ಉತ್ತಮವಾಗಿದೆ. 450 ಸರಣಿಗೆ ಹೋಲಿಸಿದರೆ ಕಂಪನಿಯು ರಿಜ್ಟಾದಲ್ಲಿ ಅನೇಕ ಹೊಸ ವೈಶಿಷ್ಟ್ಯಗಳನ್ನು ನೀಡಿದೆ.