ಮಹೀಂದ್ರಾದ ಈ ಎಸ್ಯುವಿ ಕೊಳ್ಳಬೇಕು ಎನ್ನುವವರಿಗೆ ಗುಡ್ನ್ಯೂಸ್ : ಏಪ್ರಿಲ್ನಲ್ಲಿದೆ ಈ ಆಫರ್!

ನೀವು ಮಹೀಂದ್ರಾದ ಎಸ್‌ಯುವಿ ಖರೀದಿಸಲು ಬಯಸಿದ್ದೀರಾ...? ಹಾಗಾದರೆ ಇದು ನಿಮಗೆ ಸೂಕ್ತ ಸಮಯ. ಯಾಕೆಂದರೆ, ಮಹೀಂದ್ರಾ ತನ್ನ XUV300 ಮಾದರಿ ಮೇಲೆ ಭರ್ಜರಿ ಡಿಸ್ಕೌಂಟ್ ಘೋಷಿಸಿದೆ. ದೇಶೀಯ ವಾಹನ ತಯಾರಿಕಾ ಸಂಸ್ಥೆಗಳಲ್ಲಿ ಮಹೀಂದ್ರಾ ಆಂಡ್ ಮಹೀಂದ್ರಾ ತನ್ನದೇ ಆದ ಪ್ರಾಮುಖ್ಯತೆಯನ್ನು ಹೊಂದಿದೆ. ಇದೀಗ ಏಪ್ರಿಲ್‌ನಲ್ಲಿ ಈ ಸಂಸ್ಥೆ ಗ್ರಾಹಕರಿಗೆ ಭರ್ಜರಿ ಆಫರ್ ನೀಡಿದೆ. ಇನ್ನು ಮಹೀಂದ್ರಾದ XUV3XO ಜಾಗತಿಕವಾಗಿ ಅನಾವರಣಕ್ಕೆ ಸಿದ್ಧವಾಗುತ್ತಿದೆ.

ಇದು ಬ್ರ್ಯಾಂಡ್‌ನ ಮಾದರಿ ಶ್ರೇಣಿಗೆ ಇತ್ತೀಚಿನ ಸೇರ್ಪಡೆಯಾಗಲಿದೆ. ಹೊಸ XUV3XO ಎಸ್‌ಯುವಿ XUV300 ಆಧಾರಿತ ಎಸ್‌ಯುವಿಯಾಗಿದ್ದು, ಇದರ ಬಿಡುಗಡೆಗೆ ದಿನಗಣನೆ ಶುರುವಾಗಿದೆ. ಈ ನಡುವೆ ಮಹೀಂದ್ರಾ ಆಂಡ್ ಮಹೀಂದ್ರಾ XUV300 ಎಸ್‌ಯುವಿಯ 2023ರ ಯೂನಿಟ್‌ಗಳ ಮೇಲೆ 1.59 ಲಕ್ಷ ರೂಪಾಯಿ ವರೆಗೆ ರಿಯಾಯಿತಿಗಳನ್ನು ನೀಡುವುದಾಗಿ ಘೋಷಿಸಿದೆ. ನಗದು ರಿಯಾಯಿತಿಗಳು, ಉಚಿತ ಬಿಡಿಭಾಗಗಳು ಮತ್ತು ವಿಸ್ತೃತ ವಾರಂಟಿಯನ್ನು ಒಳಗೊಂಡಿರುವ ಈ ಪ್ರಯೋಜನಗಳನ್ನು ಮಾದರಿಯ ಮಾರಾಟವಾಗದ ಸ್ಟಾಕ್ ಇರುವವರೆಗೆ ಮಾತ್ರ ನೀಡಲಾಗುತ್ತದೆ ಎಂಬುದು ಇಲ್ಲಿ ಉಲ್ಲೇಖನೀಯ ವಿಷಯ. ಮಹೀಂದ್ರಾ XUV300 ಭಾರತೀಯ ಮಾರುಕಟ್ಟೆಯಲ್ಲಿ ಮಾರುತಿ ಸುಜುಕಿ ಬ್ರೆಝಾ, ಟಾಟಾ ನೆಕ್ಸಾನ್, ಹುಂಡೈ ವೆನ್ಯೂ ಮತ್ತು ಕಿಯಾ ಸೋನೆಟ್‌ನಂತಹ ಜನಪ್ರಿಯ ಮಾದರಿಗಳೊಂದಿಗೆ ಸ್ಪರ್ಧಿಸುತ್ತದೆ.

ಪೆಟ್ರೋಲ್ ಹಾಗೂ ಡೀಸೆಲ್ ಎರಡೂ ಆಯ್ಕೆಯಲ್ಲಿಯೂ ಇದು ಗ್ರಾಹಕರಿಗೆ ಸಿಗುತ್ತದೆ. ಇದು ಐದು ಪವರ್‌ಟ್ರೇನ್ ಆಯ್ಕೆಗಳೊಂದಿಗೆ W2, W4, W6, W8, ಮತ್ತು W8(O) ಎಂಬ ಐದು ಟ್ರಿಮ್‌ಗಳನ್ನು ಒಳಗೊಂಡಿದೆ. ಈ ಆಫರ್ ವಿಷಯದಲ್ಲಿ ಗಮನಿಸಬೇಕಾದ ಇನ್ನೊಂದು ಪ್ರಮುಖ ಅಂಶವೂ ಇದೆ. ನೀವು ಆಯ್ಕೆ ಮಾಡುವ ನಿರ್ದಿಷ್ಟ ರೂಪಾಂತರಗಳು, ನಿಮ್ಮ ಸ್ಥಳ ಹಾಗೂ ನೀವು ಭೇಟಿ ನೀಡುವ ಡೀಲರ್‌ಶಿಪ್‌ಗಳನ್ನು ಅವಲಂಭಿಸಿ ಈ ರಿಯಾಯ್ತಿಯ ಡೀಲ್‌ಗಳಲ್ಲಿ ಬದಲಾವಣೆಗಳೂ ಆಗಬಹುದು ಎಂಬುದನ್ನು ನೀವು ನೆನಪಿಟ್ಟುಕೊಳ್ಳಬೇಕು. ಹೀಗಾಗಿ ನೀವು ಪಡೆಯುವ ನಿಜವಾದ ರಿಯಾಯ್ತಿ ಭಿನ್ನವಾಗಿಯೂ ಇರಬಹುದು ಎಂಬುದನ್ನು ಮರೆಯಬಾರದು.

2023 XUV300 ಪೆಟ್ರೋಲ್ ಟ್ರಿಮ್‌ಗಳನ್ನು ಖರೀದಿಸಲು ಯೋಜಿಸುತ್ತಿರುವ ಗ್ರಾಹಕರು ಟಾಪ್-ಎಂಡ್ W8 ಟ್ರಿಮ್‌ನಲ್ಲಿ ಗರಿಷ್ಠ 1.59 ಲಕ್ಷ ರೂಪಾಯಿಗಳ ರಿಯಾಯಿತಿಗಳನ್ನು ಪಡೆಯಬಹುದು. ಮತ್ತೊಂದೆಡೆ, ಡೀಸೆಲ್ W8 ರೂಪಾಂತರಗಳು 1.57 ಲಕ್ಷದವರೆಗೆ ರಿಯಾಯಿತಿಯನ್ನು ಪಡೆಯುತ್ತವೆ. 2023 XUV300 TGDi ಮಾದರಿಗಳಿಗೆ 1.50 ಲಕ್ಷ ರೂಪಾಯಿ ತನಕ ರಿಯಾಯ್ತಿ ಇದೆ. ಹೆಚ್ಚುವರಿಯಾಗಿ W6 ಟ್ರಿಮ್‌ಗಳು ಆಯ್ದ ಪವರ್‌ಟ್ರೇನ್‌ಗೆ ಅನುಗುಣವಾಗಿ ರೂ 94,000 ರಿಂದ 1.33 ಲಕ್ಷ ರೂಪಾಯಿವರೆಗೆ ರಿಯಾಯಿತಿಗಳನ್ನು ಹೊಂದಿವೆ. ಆದರೆ W4 ರೂಪಾಂತರಗಳು ರೂ 54,000 ಮತ್ತು ರೂ 95,349 ರ ನಡುವೆ ಪ್ರಯೋಜನಗಳನ್ನು ಒದಗಿಸಿದರೆ, W2 ರೂಪಾಂತರವು ರೂ 45,000 ಮೌಲ್ಯದ ಪ್ರಯೋಜನಗಳನ್ನು ನೀಡುತ್ತದೆ.ಮತ್ತೊಂದೆಡೆ, ಮಹೀಂದ್ರಾ ಈ ತಿಂಗಳ ಕೊನೆಯಲ್ಲಿ ಫೇಸ್‌ಲಿಫ್ಟೆಡ್ XUV300 ಅನ್ನು ಬಿಡುಗಡೆ ಮಾಡಲು ಸಿದ್ಧವಾಗಿದೆ.

ಅದೇ XUV 3XO. ಈ ಹೊಸ ಎಸ್‌ಯುವಿ ಬಗೆಗಿನ ಟೀಸರ್‌ಗಳನ್ನು ಕಂಪನಿ ಈಗಾಗಲೇ ಹಂಚಿಕೊಂಡಿದೆ. ಮಹೀಂದ್ರಾ XUV 3XO ಎಸ್‌ಯುವಿ 2024 ರ ಏಪ್ರಿಲ್ 29ರಂದು ಭಾರತದಲ್ಲಿ ಬಿಡುಗಡೆಯಾಗಲಿದೆ. ಹೆಚ್ಚುವರಿ ವೈಶಿಷ್ಟ್ಯಗಳು ಮತ್ತು ನವೀಕರಿಸಿದ ವಿನ್ಯಾಸದೊಂದಿಗೆ, ಹೊಸ 3XO ಬರಲಿದೆ. ಇದರ ಎಕ್ಸ್‌ ಶೋರೂಮ್ ಬೆಲೆಗಳು 8.5 ಲಕ್ಷ ರೂಪಾಯಿಯಿಂದ ಪ್ರಾರಂಭವಾಗಬಹುದು ಎಂದು ಅಂದಾಜಿಸಲಾಗಿದೆ.