ಮುಳುಗುವ ಭೀತಿಯಲ್ಲಿ ಚೀನಾದ ಅರ್ಧದಷ್ಟು ಪ್ರಮುಖ ನಗರಗಳು! ಮುಗಿತಾ ಡ್ರ್ಯಾಗನ್ ರಾಷ್ಟ್ರದ ಕಥೆ? ಸಂಶೋಧನೆ ಏನ್ ಹೇಳುತ್ತೆ?

ಬೀಜಿಂಗ್‌ : ಚೀನಾದ ಅರ್ಧದಷ್ಟು ಪ್ರಮುಖ ನಗರಗಳಿಗೆ ಮುಳುಗುವ ಭೀತಿ ಎದುರಾಗಿದ್ದು, ಕೋಟ್ಯಂತರ ಜನರು ಪ್ರಾಣಾಪಾಯಕ್ಕೆ ಸಿಲುಕಿದ್ದಾರೆ ಎಂದು ಅಧ್ಯಯನವೊಂದು ಹೇಳಿದೆ. ನೀರಿನ ಹೊರತೆಗೆಯುವಿಕೆ ಮತ್ತು ಬೃಹತ್‌ ಕಟ್ಟಡಗಳು ಹಾಗೂ ಹೆಚ್ಚುತ್ತಿರುವ ಮೂಲಸೌಕರ್ಯಗಳ ತೂಕದಿಂದ ಚೀನಾದ ನಗರಗಳು ಮುಳುಗುತ್ತಿವೆ ಎಂದು ಹೊಸ ಅಧ್ಯಯನ ಹೇಳಿದೆ. ಲೈವ್ ಸೈನ್ಸ್‌‌ ಜರ್ನಲ್‌ನಲ್ಲಿ ಪ್ರಕಟವಾದ ಸಂಶೋಧನೆಯು ಬೀಜಿಂಗ್ ಮತ್ತು ಟಿಯಾಂಜಿನ್ ಸೇರಿ ಚೀನಾದ ನಗರಗಳು ಮಧ್ಯಮದಿಂದ ತೀವ್ರ ಕುಸಿತದ ಅಪಾಯವನ್ನು ಎದುರಿಸುತ್ತಿವೆ ಎಂದು ಹೇಳಿದೆ.

ಚೀನಾದ ಶೇ.45ರಷ್ಟು ನಗರದ ಭೂಮಿ ವರ್ಷಕ್ಕೆ 3 ಮಿಲಿ ಮೀಟರ್‌ಗಿಂತಲೂ ವೇಗವಾಗಿ ಮುಳುಗುತ್ತಿದ್ದರೆ, ಶೇ.16ರಷ್ಟು ಭೂಮಿ ವರ್ಷಕ್ಕೆ 10 ಮಿಲಿ ಮೀಟರ್‌ಗಿಂತ ಅಧಿಕ ಪ್ರಮಾಣದಲ್ಲಿ ಮುಳುಗುತ್ತಿದೆ ಎಂದು ಅಧ್ಯಯನ ತಿಳಿಸಿದೆ.ಈ ಸಂಶೋಧನೆ ನಡೆಸಲು ವಿಜ್ಞಾನಿಗಳು 2015 ರಿಂದ 2022ರ ಅವಧಿಯಲ್ಲಿ 2 ಮಿಲಿಯನ್‌ಗಿಂತಲೂ ಹೆಚ್ಚು ಜನಸಂಖ್ಯೆ ಹೊಂದಿರುವ ಎಲ್ಲ ಚೀನಾ ನಗರಗಳ ಭೂಕುಸಿತವನ್ನು ಅಳೆದಿದ್ದಾರೆ. ಅವರು ಪರಿಶೀಲನೆ ನಡೆಸಿದ 82 ನಗರಗಳಲ್ಲಿ ಕೆಲವು ನಗರಗಳು ವೇಗವಾಗಿ ಮುಳುಗುತ್ತಿರುವುದು ಕಂಡುಬಂದಿದ್ದರೆ, ಪ್ರತಿ ಆರರಲ್ಲಿ ಒಂದು ನಗರ ವರ್ಷಕ್ಕೆ 10 ಮಿಮೀಗೂ ಹೆಚ್ಚು ಕುಸಿತ ಕಂಡಿದೆ.

ಚೀನಾದ ಅತಿದೊಡ್ಡ ನಗರ ಶಾಂಘೈ ಕಳೆದ ಶತಮಾನದಲ್ಲಿ 3 ಮೀಟರ್‌ಗಳವರೆಗೆ ಮುಳುಗಿದ ಬಳಿಕ ಕುಸಿಯುತ್ತಲೇ ಇದೆ. ಇನ್ನು, ಬೀಜಿಂಗ್ ತನ್ನ ಸುರಂಗ ಮಾರ್ಗಗಳು ಮತ್ತು ಹೆದ್ದಾರಿಗಳ ಬಳಿ ವರ್ಷಕ್ಕೆ 45 ಮಿಲಿ ಮೀಟರ್‌ಗಳಷ್ಟು ಮುಳುಗುತ್ತಿದೆ ಎಂಬುದನ್ನು ಕಂಡುಕೊಂಡಿದ್ದಾರೆ. ವ್ಯಾಪಕ ಅಂತರ್ಜಲ ಬಳಕೆ ಹಾಗೂ ಕಟ್ಟಡಗಳ ತೂಕದಂತಹ ಅಂಶಗಳು ನಗರಗಳ ಮುಳುಗುವಿಕೆಗೆ ಸಂಬಂಧ ಹೊಂದಿವೆ ಎಂದು ಸಂಶೋಧಕರು ಹೇಳಿದ್ದಾರೆ. ಅತಿ ಎತ್ತರದ ಕಟ್ಟಡಗಳು ಹುಟ್ಟಿಕೊಳ್ಳುತ್ತಿದ್ದು, ರಸ್ತೆಗಳು ವಿಸ್ತಾರ ಆಗುತ್ತಿದ್ದು, ಹೆಚ್ಚು ಅಂತರ್ಜಲ ಬಳಸಲಾಗುತ್ತಿದೆ. ಎಲ್ಲವೂ ತ್ವರಿತಗತಿಯಲ್ಲಿ ನಡೆಯುತ್ತಿರುವುದರಿಂದ ಭೂಮಿಗೆ ಹೆಚ್ಚಿನ ಒತ್ತಡ ಬೀಳುತ್ತಿದೆ ಎಂದು ವಿಜ್ಞಾನಿಗಳು ಹೇಳಿದ್ದಾರೆ.

ನಿಸರ್ಗದ ಜೊತೆ ಮಾನವನು ಕಾರಣ!ನಗರಗಳ ಕುಸಿತಕ್ಕೆ ನೈಸರ್ಗಿಕ ಅಂಶಗಳ ಜೊತೆ ಮಾನವ ನಿರ್ಮಿತ ಅಂಶಗಳು ಕೂಡ ಇವೆ. ಪ್ರತಿ ನಗರದ ಭೌಗೋಳಿಕ ಸಂಯೋಜನೆ ಮತ್ತು ಬಂಡೆಯ ತಳವನ್ನು ಒಳಗೊಂಡಿದೆ. ಇದು ನಗರದ ತೂಕದ ಪ್ರಮಾಣಕ್ಕನುಗುಣವಾಗಿ ಮುಳುಗದೇ ಹಿಡಿದಿಟ್ಟುಕೊಳ್ಳಲು ಪ್ರಭಾವಿಸುತ್ತದೆ ಎಂದಿರುವ ವಿಜ್ಞಾನಿಗಳು ಮುಳುಗುತ್ತಿರುವ ನಗರಗಳು ಮತ್ತು ಅಂತರ್ಜಲ ಕೊರತೆಯ ನಡುವೆ ನೇರ ಸಂಬಂಧ ಇದೆ ಎಂದು ತಿಳಿಸಿದ್ದಾರೆ. ಅಂತರ್ಜಲ ಬಳಕೆಯ ಮೇಲೆ ನಿಯಂತ್ರಣ ಅಗತ್ಯಇದರ ಜೊತೆ ನಗರ ಸಾರಿಗೆ ಜಾಲಗಳು, ಹೈಡ್ರೋಕಾರ್ಬನ್ ಹೊರತೆಗೆಯುವಿಕೆ ಮತ್ತು ಗಣಿಗಾರಿಕೆ ಕೂಡ ನಗರದ ಕುಸಿತಕ್ಕೆ ಕಾರಣವಾಗಿವೆ.

ಅಂತರ್ಜಲ ಬಳಕೆಯ ನಿರಂತರ ನಿಯಂತ್ರಣದಿಂದ ನಗರಗಳನ್ನು ಕುಸಿಯದಂತೆ ತಡೆಗಟ್ಟಬಹುದು ಎಂದು ವಿಜ್ಞಾನಿಗಳು ಹೇಳಿದ್ದಾರೆ. ಇನ್ನು, ಕಡಲತೀರದ ನಗರಗಳಲ್ಲಿ ಕುಸಿತದ ಪ್ರಮಾಣ ಮತ್ತಷ್ಟು ಹೆಚ್ಚಲಿದೆ ಎಂದು ಸಂಶೋಧಕರು ಹೇಳಿದ್ದಾರೆ.