ക്രിസ്റ്റ്യാനോയുടെ ഏഴാം നമ്പർ ജേഴ്സി പുതിയ താരത്തിന്, ഞെട്ടിച്ച് പോർച്ചുഗൽ ടീം; 17 വർഷത്തിന് ശേഷം ഇതാദ്യം

പോർച്ചുഗൽ ഇതിഹാസ ഫുട്ബോളർ ക്രിസ്റ്റ്യാനോ റൊണാൾഡോയുടെ (Cristiano Ronaldo) ഏഴാം നമ്പർ ജഴ്സി അണിഞ്ഞ് പുതിയൊരു താരം കളത്തിൽ. 22 വർഷം നീണ്ട ദേശീയ ടീം കരിയറിൽ ക്രിസ്റ്റ്യാനോ മഹാഭൂരിപക്ഷം സമയവും ഏഴാം നമ്പർ ജഴ്സി ആണ് അണിഞ്ഞത്. നീണ്ട 17 വർഷം ക്രിസ്റ്റ്യാനോ റൊണാൾഡോ അണിഞ്ഞ ഏഴാം നമ്പറിനാണ് ഇപ്പോൾ പുതിയൊരു അവകാശി എത്തിയത്. ക്രിസ്റ്റ്യാനോ റൊണാൾഡോ വിരമിക്കുന്നതിനു മുമ്പുതന്നെ അദ്ദേഹത്തിൻറെ ജഴ്സി നമ്പർ മറ്റൊരു താരത്തിനു നൽകിയത് സൂപ്പർ താരത്തിന്റെ വിരമിക്കലിനുള്ള സൂചനയാണോ എന്നും സംശയിക്കേണ്ടിയിരിക്കുന്നു.

കാരണം, 39 കാരനായ സി ആർ 7 (CR7) ദേശീയ ജഴ്സിയിൽ നാളേറെയായി 90 മിനിറ്റ് കളത്തിൽ ചിലവഴിക്കാറില്ല. 2022 ഫിഫ ഖത്തർ ലോകകപ്പിന്റെ പ്രീ ക്വാർട്ടർ, ക്വാർട്ടർ പോരാട്ടങ്ങളിൽ റൊണാൾഡോയെ സൈഡ് ബെഞ്ചിൽ ഇരുത്താൻ വരെ അന്നത്തെ മുഖ്യ പരിശീലകനായ ഫെർണാണ്ടോ സാന്റോസ് മടിച്ചില്ല എന്നതും ശ്രദ്ധേയം. പോർച്ചുഗലിന്റെ പുതിയ പരിശീലകനായ റോബർട്ടോ മാർട്ടിനെസുമായി സി ആർ 7 ന് നല്ല ബന്ധമാണ്. 2022 ഫിഫ ലോകകപ്പിനു ശേഷമാണ് മാർട്ടിനെസ് പോർച്ചുഗൽ ദേശീയ ടീമിന്റെ മുഖ്യ പരിശീലക വേഷത്തിൽ എത്തിയത്.

2024 യുവേഫ യൂറോ കപ്പ് യോഗ്യതാ റൗണ്ടിൽ 10 മത്സരങ്ങളിലും ജയം നേടിയ ചരിത്ര നേട്ടം കുറിച്ചാണ് പോർച്ചുഗൽ ഫൈനൽ റൗണ്ടിനുള്ള ടിക്കറ്റ് കരസ്ഥമാക്കിയത്. മാർട്ടിനെസിന്റെ കീഴിൽ പോർച്ചുഗൽ ഇറങ്ങിയ 11 -ാം മത്സരത്തിലാണ് ക്രിസ്റ്റ്യാനോ റൊണാൾഡോ അണിഞ്ഞിരുന്ന ഏഴാം നമ്പർ ജഴ്സി മറ്റൊരു താരം ഇട്ടത്. സ്വീഡന് എതിരായ സൗഹൃദ മത്സരത്തിലായിരുന്നു അത്. ആ മത്സരത്തിൽ ക്രിസ്റ്റ്യാനോ റൊണാൾഡോ കളിക്കാൻ ഉണ്ടായിരുന്നില്ല. സൗദി പ്രൊ ലീഗ് ക്ലബ്ബായ അൽ നസർ എഫ് സിക്കു വേണ്ടി കളിക്കുന്ന ക്രിസ്റ്റ്യാനോ റൊണാൾഡോ വിശ്രമവേള കുടുംബ സമേതം ആഘോഷിക്കുന്നതിനായാലിരുന്നു സ്വീഡന് എതിരായ മത്സരത്തിൽ നിന്ന് വിട്ടുനിന്നത്.

സ്വീഡന് എതിരായ മത്സരത്തിൽ 29 കാരനായ ബ്രൂമയാണ് പോർച്ചുഗലിന്റെ ഏഴാം നമ്പർ അണിഞ്ഞത്. 46 -ാം മിനിറ്റിൽ മാത്യൂസ് നൂനെസിൻറെ പകരക്കാരനായി ബ്രൂമ കളത്തിൽ എത്തുകയായിരുന്നു. ക്രിസ്റ്റ്യാനോ റൊണാൾഡോ അല്ലാതെ 2007 നു ശേഷം പോർച്ചുഗലിന്റെ ഏഴാം നമ്പർ അണിയുന്ന ആദ്യ താരമാണ് ബ്രൂമ. സി ആർ 7 ( ക്രിസ്റ്റ്യാനോ റൊണാൾഡോ 7 ) എന്ന ബ്രാൻഡ് തന്നെ ഉണ്ടാകാൻ കാരണമായ നമ്പറാണ് ഏഴ്. ക്രിസ്റ്റ്യാനോ റൊണാൾഡോയ്ക്ക് മുമ്പ് ലൂയിസ് ഫിഗൊ ആയിരുന്നു പോർച്ചുഗലിന്റെ ഏഴാം നമ്പർ ജഴ്സി അണിഞ്ഞിരുന്നത്.

പോർച്ചുഗലിന്റെ ഏഴാം നമ്പർ ജഴ്സിയുടെ മേന്മ കളത്തിൽ പ്രകടിപ്പിച്ചാണ് ബ്രൂമ മടങ്ങിയത് എന്നതും ശ്രദ്ധേയം. 57 -ാം മിനിറ്റിൽ ബ്രൂണോ ഫെർണാണ്ടസിന്റെ അസിസ്റ്റിൽ ബ്രൂമ പോർച്ചുഗലിനായി ഗോൾ സ്വന്തമാക്കി. 2024 കലണ്ടർ വർഷത്തിൽ ബ്രൂമയുടെ ആദ്യ മത്സരമായിരുന്നു. പോർച്ചുഗൽ ജഴ്സിയിൽ താരത്തിന്റെ രണ്ടാം ഗോളാണിത്. 2017 ൽ പോർച്ചുഗലിനായി കളത്തിൽ ഇറങ്ങിയ ഈ 29 കാരൻ ഇതുവരെ 12 മത്സരങ്ങൾ കളിച്ചു. ക്ലബ് ഫുട്ബോളിൽ പോർച്ചുഗൽ ക്ലബ്ബായ ബ്രാഗയ്ക്കു വേണ്ടിയാണ് ഇദ്ദേഹം ബൂട്ട് അണിയുന്നത്.

2023 - 2024 സീസണിൽ 30 മത്സരങ്ങളിൽ എട്ട് ഗോൾ സ്വന്തമാക്കി. ക്ലബ് കരിയറിൽ 390 മത്സരങ്ങളിൽ 71 ഗോളുണ്ട്.