ചർമ്മം നല്ല ക്രിസ്റ്റൽ ക്ലിയറാക്കാനും യുവത്വം നിലനിർത്താനും ശംഖുപുഷ്പം ക്രീം

മിക്ക നടിമാരെ കാണുമ്പോഴും ഇത്രയും ഭംഗിയുള്ള ചർമ്മം എങ്ങനെ ഇവർക്ക് കിട്ടുന്നു എന്ന് ആലോചിക്കാത്ത ആരും കാണില്ല. മേക്കപ്പ് ഇട്ടില്ലെങ്കിൽ പോലും അവരുടെ ചർമ്മത്തിന് പ്രത്യേക ഭംഗിയാണ്. സ്വാഭാവികമായ നിറവും ക്ലിയർ ചർമ്മവുമൊക്കെ നേടണമെങ്കിൽ വെറുതെ പറ്റില്ല. ജീവിതശൈലിയും ഭക്ഷണശൈലിയുമൊക്കെ അതുപോലെ ശ്രദ്ധിക്കണം. ഇതോടൊപ്പം വീട്ടിലിരുന്ന് ചെയ്യാൻ പറ്റുന്ന ചെറിയ ചില പൊടികൈകൾ കൂടിയുണ്ടെങ്കിൽ ചർമ്മം കൂടുതൽ സുന്ദരമാകും.

ചർമ്മത്തിന് വേണ്ടി വളരെ എളുപ്പത്തിൽ വീട്ടിൽ തന്നെ ചെയ്യാൻ കഴിയുന്ന ഒരു ഫേസ് ക്രീം നമുക്ക് തയാറാക്കാം.
ശംഖുപുഷ്പം

എല്ലാ വീടുകളിലെയും തൊടിയിൽ വളരെ സുലഭമായി കണ്ടുവരുന്നതാണ് ശംഖുപുഷ്പം. ധാരാളം ഔഷധ ഗുണങ്ങളാൽ സമ്പുഷ്ടമാണ് ശംഖുപുഷ്പമെന്ന് എല്ലാവർക്കുമറിയാം. അതുപോലെ ചർമ്മത്തിനും ഏറെ നല്ലതാണ് ഈ പൂവ്. ചർമ്മത്തിലെ പ്രായമാകുന്നതിൻ്റെ ലക്ഷണങ്ങളെ തടയാൻ ഏറെ നല്ലതാണ് ശംഖുപുഷ്പം. മുഖത്തിന് പുതുജീവനും തിളക്കവും നൽകാൻ സഹായിക്കും. അതുപോലെ ചർമ്മത്തിലെ ചുവപ്പ്, റാഷസ് എന്നിവ ഇല്ലാതാക്കാനും ഇത് വളരെ നല്ലതാണ്. കൊളജൻ ഉത്പ്പാദനം വർധിപ്പിക്കാനും ചുളിവുകൾ ഇല്ലാതാക്കാനും ഇത് സഹായിക്കും. മാത്രമല്ല ചർമ്മത്തിന് മോയ്ചറൈസർ കൂട്ടാനും നല്ലതാണ്.

കറ്റാർവാഴ ജെൽ

ചർമ്മകാന്തി ഏറ്റവും കൂടുതൽ ആളുകൾ ഉപയോഗിക്കുന്നത് കറ്റാർവാഴയാണ്. ഇത് ചർമ്മത്തിൻ്റെ പല പ്രശ്നങ്ങളെയും നിമിഷ നേരം കൊണ്ട് ഇല്ലാതാക്കും. കറ്റാർവാഴയിൽ ധാരാളം ആൻ്റി ഓക്സിഡൻ്റുകൾ അടങ്ങിയിട്ടുണ്ട്. നിറവ്യത്യാസം, ചുളിവുകൾ, പാടുകൾ, കണ്ണിനടിയിലെ കറുപ്പ് എന്നിവയെല്ലാം ഇല്ലാതാക്കാൻ സഹായിക്കുന്നതാണ് കറ്റാർവാഴ. പണ ചിലവ് ഇല്ലാതെ ചർമ്മം സുന്ദരമാക്കാൻ കറ്റാർവാഴയിലൂടെ കഴിയും. കൂടാതെ ചർമ്മത്തിന് മൃദുത്വം തിളക്കവും നൽകും.

വൈറ്റമിൻ ഇ

ചർമ്മ പ്രശ്നങ്ങൾക്കുള്ള ഉത്തമ പരിഹാരമാണ് വൈറ്റമിൻ ഇ. ഇത് പൊതുവെ ചർമ്മത്തിന് തിളക്കം കൂട്ടാനും അതുപോലെ മറ്റ് പ്രകോപനങ്ങളെ ശമിപ്പിക്കാനും സഹായിക്കും. ആൻ്റി ഏജിംഗ് പ്രോപ്പർട്ടികളാൽ സമ്പുഷ്ടമാണ് വൈറ്റമിൻ ഇ. ഹൈപ്പർ പിഗ്മൻ്റേഷൻ കുറയ്ക്കാനും അതുപോലെ സൺ ടാൻ പ്രശ്നങ്ങൾ മാറ്റാനും വൈറ്റമിൻ ഇ സഹായിക്കും. മാത്രമല്ല ചർമ്മത്തിൻ്റെ സ്വാഭാവിക ഈർപ്പം നിലനിർത്താനും ഏറെ നല്ലതാണ് വൈറ്റമിൻ ഇ.

ക്രീം തയാറാക്കാൻ

ശംഖുപുഷ്പത്തിൻ്റെ പൂവ് 6 എണ്ണം എടുക്കുക. ഇനി ഇത് നന്നായി അരച്ച് അതിൻ്റെ നീര് അരിച്ച് എടുക്കുക. ഇനി ഇതിലേക്ക് അൽപ്പം കറ്റാർവാഴയുടെ ജെല്ലും ഒരു വൈറ്റമിൻ ഇ ഗുളികയും പൊട്ടിച്ച് ചേർക്കുക. ഇത് നന്നായി യോജിപ്പിക്കുക. ഈ ക്രീം മുഖത്തിട്ട് ഒരു 20 മിനിറ്റിന് ശേഷം കഴുകി വ്യത്തിയാക്കാവുന്നതാണ്.