എന്നും ചെറുപ്പമാകാന് മുട്ട

ആരോഗ്യത്തിന് സഹായിക്കുന്നതില്‍ ഭക്ഷണത്തിന് പ്രധാന പങ്കുണ്ട്. ചില പ്രത്യേക ഭക്ഷണങ്ങള്‍ ആരോഗ്യം നല്‍കും, ചിലത് അനാരോഗ്യവും. ഭക്ഷണത്തില്‍ തന്നെ ചെറുപ്പം നില നിര്‍ത്താനും സൗന്ദര്യത്തിനും ചര്‍മാരോഗ്യത്തിനും സഹായിക്കുന്ന പല ഭക്ഷണ വസ്തുക്കളുമുണ്ട്. ഇത്തരത്തില്‍ ഒന്നാണ് മുട്ട. ആരോഗ്യത്തിനും സൗന്ദര്യത്തിനും മുടിയുടെ ആരോഗ്യത്തിനുമെല്ലാം ഒരുപോലെ ഇത് സഹായിക്കുന്നു.

​ചര്‍മത്തിന് ചെറുപ്പം​

ചര്‍മത്തിന് ചെറുപ്പം നില നിര്‍ത്താന്‍ സഹായിക്കുന്ന ഭക്ഷണങ്ങളില്‍ ഒന്നാണ് മുട്ട. ഇത് ആന്റിഓക്‌സിഡന്റുകളാല്‍ സമ്പുഷ്ടമാണ്. കൊളാജന്‍ സമ്പുഷ്ടമാണ്. കൊളാജനാണ് ചര്‍മകോശങ്ങള്‍ക്ക് ഇറുക്കം നല്‍കുന്നതും ചര്‍മത്തില്‍ ചുളിവുകളും വരകളും വരുന്നത് തടയുന്നതും. പ്രായമാകുമ്പോള്‍ കൊളാജന്‍ ഉല്‍പാദനം കുറയുന്നതാണ് ചര്‍മം അയഞ്ഞു തൂങ്ങാന്‍ ഇടയാക്കുന്നതും ചര്‍മത്തില്‍ ചുളിവ് വരുത്തുന്നതും. ഇതിനുള്ള നല്ലൊരു പരിഹാരമാണ് മുട്ട. ഇതില്‍ കൊളാജന്‍ അടങ്ങിയിട്ടുണ്ട്. ഇത് കഴിയ്ക്കുന്നതും മുഖത്ത് പുരട്ടുന്നതും നല്ലതാണ്.

​മുടിയുടെ ആരോഗ്യത്തിനും​

മുടിയുടെ ആരോഗ്യത്തിനും ഇതേറെ നല്ലതാണ്. ധാരാളം പ്രോട്ടീനുകള്‍ അടങ്ങിയ ഭക്ഷണമാണ് മുട്ട. പ്രോട്ടീനുകള്‍ മുടിയുടെ ആരോഗ്യത്തിന് പ്രധാനമാണ്. മുടിയുടെ വളര്‍ച്ചയ്ക്ക് ആവശ്യമായ പല വൈറ്റമിനുകളും മുട്ടയില്‍ അടങ്ങിയിട്ടുമുണ്ട്. മുടിയുടെ ആരോഗ്യത്തിന് സഹായിക്കുന്ന ബയോട്ടിന്‍ മുട്ടയിലുണ്ട്. മുട്ടയിലെ ആരോഗ്യകരമായ കൊഴുപ്പ് മുടിയിഴകളെ ആരോഗ്യമുള്ളതും തിളക്കമുള്ളതുമാക്കി മാറ്റുന്നു. മുടിയുടെ കട്ടി കൂടാനും ഇത് സഹായിക്കുന്നു. ഇത് ഹെയര്‍ മാസ്‌കായി പുരട്ടുന്നതും നല്ലതാണ്.

​തലച്ചോറിന്റെ ആരോഗ്യത്തിന്​

തലച്ചോറിന്റെ ആരോഗ്യത്തിന് ഏറ്റവും നല്ല ഒരു ഭക്ഷണമാണ് മുട്ട. ദിവസവും മുട്ട കഴിക്കുന്നതിലൂടെ വിളര്‍ച്ച പോലെയുള്ള അസുഖങ്ങള്‍ കുറയ്ക്കുവാന്‍ സഹായകരമാകും. കൂടാതെ ദിവസവും പ്രാതലില്‍ മുട്ട ഉള്‍പ്പെടുത്തുന്നത് അമിത വണ്ണം കുറയ്ക്കുവാനും ശരീരത്തിന് ആവശ്യമായ ഊര്‍ജ്ജം നല്‍കുവാനും സഹായിക്കും. ദിവസവും മുട്ട കഴിക്കുന്നതിലൂടെ ശരീരത്തില്‍ കാത്സ്യത്തിന്റെ അളവ് വര്‍ധിക്കാന്‍ സഹായകമാണ്. വിറ്റാമിന്‍ ഡി ധാരാളം അടങ്ങിയിട്ടുള്ള ഒന്നാണ് മുട്ട. കാത്സ്യത്തിന്റെ അളവ് ശരീരത്തില്‍ വര്‍ധിക്കുന്നതോടെ എല്ലുകള്‍ക്കും പല്ലുകള്‍ക്കും ആരോഗ്യം ലഭിക്കും.