മെറ്റബോളിസം വേഗത്തിലും എളുപ്പത്തിലുമാക്കാൻ ഈ ഭക്ഷണങ്ങൾ കഴിച്ചോളൂ

നമ്മൾ കഴിക്കുന്ന ഭക്ഷണത്തിൽ നിന്നാണ് ശരീരത്തിന് ആവശ്യമായ ഊ‍ർജ്ജം ലഭിക്കുന്നത്. കഴിക്കുന്ന ഭക്ഷണത്തിൽ നിന്ന് കൃത്യമായി പോഷകങ്ങളെ ആഗിരണം ചെയ്ത് ദഹനം നടക്കേണ്ടത് വളരെ പ്രധാനമാണ്. ശരിയായ രീതിയിൽ ദഹനം നടന്നില്ലെങ്കിൽ പലപ്പോഴും അത് ശരീരത്തിൽ കൊഴുപ്പ് അടിയാൻ കാരണമായേക്കും. ശരീരത്തിൽ ആരോഗ്യകരമായ ഭാരം നിലനിർത്താൻ മെറ്റബോളിസത്തിലൂടെ ആവശ്യമായ പോഷകങ്ങൾ ലഭിക്കണം.

ചിലരുടെ മെറ്റബോളിസം വളരെ ദുർബലമായിരിക്കും. അത് അമിതവണ്ണത്തിന് കാരണമാകുന്നു. ശരീരത്തിലെ ആരോഗ്യകരമായ ഭാരം നിലനിർത്തുന്നതിനും മെറ്റബോളിസം കാര്യക്ഷമമായി നിലനിർത്തുന്നതിനുമുള്ള ഏഴ് ഭക്ഷണങ്ങൾ നോക്കാം.
ജീരക വെള്ളം

പല തരത്തിലുള്ള ആരോ​ഗ്യ ​ഗുണങ്ങളാണ് ജീരക വെള്ളത്തിനുള്ളതെന്ന് എല്ലാവർക്കുമറിയാം. ഇത് പലപ്പോഴും ശരീരത്തിന് ഏറെ നല്ലതാണ്. ജീരകം വെള്ളം കുടിക്കുന്നത് ​ഗ്യാസ് പോലെയുള്ള പ്രശ്നങ്ങളെ ഒഴിവാക്കാൻ സഹായിക്കും. ഇത് ദഹനം സുഗമമാക്കുകയും പോഷകങ്ങൾ വലിച്ചെടുക്കാൻ വളരെയധികം സഹായിക്കുകയും ചെയ്യുന്നു. ജീരകം മെറ്റബോളിസം വർദ്ധിപ്പിക്കുകയും കൊഴുപ്പിനെ വേ​ഗത്തിൽ കത്തിക്കാൻ സഹായിക്കുകയും ചെയ്യുന്നു. ഇതുമൂലം വയറിൻ്റെ ആരോഗ്യവും അതുപോലെ ശരിയായ ഭാരവും നിയന്ത്രിക്കാൻ സഹായിക്കുന്നു. ആരോഗ്യകരമായ ഭക്ഷണക്രമവും വ്യായാമവും ഇതിന് അത്യാവശ്യമാണ്.

ബെറീസ്

കഴിക്കാൻ പലർക്കും ഇഷ്ടമുള്ളതാണ് ബെറീസ്. കാണാൻ ഭം​ഗിയുള്ളതും എന്നാൽ കഴിച്ചാൽ വിവിധതരം ​ഗുണങ്ങൾ നൽകുന്നതുമാണ് ബെറീസ് എന്ന് തന്നെ പറയാം. കാണാൻ മനോഹരം മാത്രമല്ല, കഴിക്കാൻ രുചികരവും വിവിധ പോഷകങ്ങൾ അടങ്ങിയതുമാണ്. ബ്ലൂബെറി, സ്ട്രോബെറി, റാസ്ബെറി എന്നിവയിൽ അടങ്ങിയിരിക്കുന്ന നാരുകൾ, ആൻ്റിഓക്‌സിഡൻ്റുകൾ ദഹനത്തെയും മെറ്റബോളിസത്തെയും ആരോഗ്യകരമായി നിലനിർത്തുന്നു. ഇവയിൽ ജലാംശം കൂടുതലും കലോറി കുറവുമാണ്.

​​ഗ്രീക്ക് യോ​ഗർട്ട്

പൊതുവെ മലയാളികൾക്ക് യോഗർട്ട് അത്ര പ്രിയമല്ലെങ്കിലും തൈരിൻ്റെ വകഭേദം തന്നെയാണ് യോഗർട്ട്. പ്രോട്ടീനും പ്രോബയോട്ടിക്സും കൊണ്ട് സമ്പുഷ്ടമായ പച്ച തൈര് ആരോഗ്യകരമായ ദഹനവും മെറ്റബോളിസവും നിലനിർത്താൻ സഹായിക്കുന്നു. പഞ്ചസാര കുറയ്ക്കാൻ മധുരമില്ലാത്ത പ്ലെയിൻ തൈര് കഴിക്കാവുന്നതാണ്. ഭക്ഷണത്തിന് ശേഷം ഇത് ബദാം അല്ലെങ്കിൽ ഫ്രഷ് ഫ്രൂട്ട് ഉപയോഗിച്ച് കഴിക്കാം.

​പ്രോട്ടീൻ അടങ്ങിയ ഭക്ഷണങ്ങൾ

ബീൻസ്, മത്സ്യം, ചിക്കൻ, ടോഫു തുടങ്ങിയ ഭക്ഷണങ്ങൾ കഴിക്കുന്നത് നിങ്ങളുടെ മെറ്റബോളിസം വേഗത്തിലാക്കും. പ്രോട്ടീൻ ദഹിപ്പിക്കാൻ കൂടുതൽ ഊർജ്ജം ആവശ്യമാണ്. ഇത് മെറ്റബോളിസം വർദ്ധിപ്പിക്കുന്നു. പ്രോട്ടീൻ ശരീരത്തിന് വളരെ അധികം ആവശ്യമുള്ള ഒന്നാണ്. മെറ്റബോളിസം വേ​ഗത്തിലാക്കാനും അതുപോലെ പേശികളുടെ ആരോ​ഗ്യത്തിനും ഏറെ പ്രധാനമാണത്.

ഗ്രീൻ ടീ

അമിതവണ്ണം കുറയ്ക്കാൻ ​ആ​ഗ്രഹിക്കുന്നവരുടെ പ്രിയ ഭക്ഷണമാണ് ​ഗ്രീൻ ടീ. ഗ്രീൻ ടീയുടെ ആരോഗ്യ ഗുണങ്ങളെക്കുറിച്ച് പറഞ്ഞ് അറിയിക്കേണ്ട ആവശ്യമില്ല. ഭക്ഷണത്തിന് ശേഷം ഗ്രീൻ ടീ കുടിച്ചാൽ അത് ആൻ്റിഓക്‌സിഡൻ്റുകൾ പുറപ്പെടുവിക്കും. ഗ്രീൻ ടീ കുടിക്കുന്നത് മെറ്റബോളിസം വേഗത്തിലാക്കാനും കൊഴുപ്പ് കത്തിക്കാനും സഹായിക്കുന്നു.