പ്രവാസികള്ക്കുള്ള 'ആധാര് ഓണ് അറൈവല്' എന്താണ്? വിദേശത്തു നിന്ന് അപേക്ഷിക്കാം, അറിയാം വിശദമായി
കൊച്ചി: വിദേശത്ത് കഴിയുന്ന ഇന്ത്യക്കാര്‍ക്ക് (എന്‍ആര്‍ഐ) ആധാര് കാര്‍ഡ് ലഭിക്കുന്നതിന് 'ആധാര് ഓണ് അറൈവല്' എന്ന വ്യവസ്ഥ യുണീക്ക് ഐഡന്റിഫിക്കേഷന്‍ അതോറിറ്റി ഓഫ് ഇന്ത്യ (യുഐഡിഎഐ) നടപ്പാക്കിയിട്ടുണ്ട്. ഇതിനായി ഓണ്‍ലൈനായോ ഓഫ്‌ലൈനായോ അപ്പോയിന്റ്മെന്റ് എടുക്കാനും സാധിക്കും. എന്നാല്‍ നടപടിക്രമങ്ങള്‍ പൂര്‍ത്തിയാക്കാന്‍ എന്റോള്‍മെന്റ് സെന്ററില്‍ നേരിട്ട് ഹാജരാവേണ്ടതുണ്ട്.
ബയോമെട്രിക് ഡാറ്റയുമായി ലിങ്ക് ചെയ്തിരിക്കുന്നതാണ് ആധാര് എന്നതിനാലാണ് നേരിട്ട് ഹാജരാവല്‍ നിര്‍ബന്ധമായി വരുന്നത്. ബയോമെട്രിക് പ്രാമാണീകരണം പൂര്‍ത്തിയാക്കാന്‍ അവര്‍ ഇന്ത്യയിലെ സര്‍വീസ് കേന്ദ്രങ്ങളില്‍ നേരിട്ട് ഹാജരാകേണ്ടതുണ്ട്. പത്ത് കൈവിരലുകളുടെയും രണ്ട് കണ്ണുകളുടെയും സ്‌കാനിങ് ആവശ്യമാണ്. പ്രവാസികള്‍ക്ക് ആധാര് വേണോ?പ്രവാസി ഇന്ത്യക്കാര്‍ക്ക് (എന്‍ആര്‍ഐ) ആധാര് നിര്‍ബന്ധമില്ലെങ്കിലും കൈവശം വയ്ക്കുന്നത് നല്ലതായിരിക്കും. ഇന്ത്യയിലേക്ക് മടങ്ങാനോ ദീര്‍ഘകാലത്തേക്ക് രാജ്യത്ത് തുടരാനോ ആഗ്രഹിക്കുന്നുവെങ്കില്‍ ഇത് ആവശ്യമായി വരും. ബാങ്ക് അക്കൗണ്ടുകള്‍ തുറക്കുന്നതിനും വസ്തുവകകള്‍ വാടകയ്‌ക്കെടുക്കുന്നതിനും വാങ്ങുന്നതിനും മറ്റ് സാമ്പത്തിക ഇടപാടുകള്‍ക്കും സര്‍ക്കാര്‍ പ്രക്രിയകള്‍ക്കും ഇത് ഉപകരിക്കും. എന്താണ് ആധാര്?
ഇന്ത്യയിലെ ഐഡന്റിറ്റി, വയസ്സ്, വിലാസം എന്നിവ തെളിയിക്കാനുള്ള ആധികാരിക രേഖയാണ് ആധാര്. കേന്ദ്രീകൃത അദ്വിതീയ 12 അക്ക നമ്പര്‍ ഓരോ കാര്‍ഡിനും ഉണ്ടാവും. ഈ നമ്പര്‍ എല്ലാവിധ ആവശ്യങ്ങള്‍ക്കും പര്യാപ്തമാണ്. എങ്ങനെ അപേക്ഷിക്കാം?'ആധാര് ഓണ് അറൈവല്' ഉപയോഗപ്പെടുത്താന്‍ ഇന്ത്യയിലേക്ക് വരുന്നതിന്റെ മുമ്പായി പ്രവാസി ഓണ്‍ലൈനായോ ഓഫ്‌ലൈനായോ അപ്പോയിന്റ്മെന്റ് എടുക്കണം. വിദേശത്ത് കഴിയുന്ന ഇന്ത്യക്കാരായ കുട്ടികള്‍ക്കും ഭാര്യക്കുമെല്ലാം ഇതുപോലെ ആധാറിന് അപേക്ഷിക്കാം. വിവിധ തരം ഫോമുകള്‍
വിവിധ പ്രായക്കാര്‍ക്കായി വിവിധ രൂപത്തിലുള്ള ആധാര് അപേക്ഷാ ഫോമുകളാണുള്ളത്. 18 വയസ് പൂര്‍ത്തിയായ സാധാരണക്കാര്‍ ഫോം നമ്പര്‍ ഒന്നാണ് ഉപയോഗിക്കേണ്ടത്. ഇന്ത്യക്ക് പുറത്തുള്ള വിലാസത്തില്‍ എന്റോള്‍ ചെയ്യുന്ന അല്ലെങ്കില്‍ അപ്ഡേറ്റ് ചെയ്യുന്ന പ്രവാസികള്‍ക്കുള്ളതാണ് ഫോം രണ്ട്. അഞ്ചു മുതല്‍ 18 വയസ്സിന് താഴെയുള്ള കുട്ടികള്‍, ഇന്ത്യന്‍ വിലാസ തെളിവുള്ള താമസക്കാര്‍ അല്ലെങ്കില്‍ എന്‍ആര്‍ഐകള്‍ എന്നിവര്‍ ഫോം മൂന്ന് ഉപയോഗിക്കണം. ഇന്ത്യന്‍ അഡ്രസ് പ്രൂഫ് ഇല്ലാതെ എന്‍ആര്‍ഐ കുട്ടികള്‍ക്ക് ആധാര് ലഭിക്കാന്‍ ഫോം നാല് ആണ് പൂരിപ്പിച്ചു നല്‍കേണ്ടത്. ഓണ്‍ലൈന്‍ അപ്പോയിന്റ്മെന്റ്
ഓണ്‍ലൈനായി അപ്പോയിന്റ്മെന്റ് ബുക്ക് ചെയ്യാന്‍ യുഐഡിഎഐ വെബ്സൈറ്റ് സന്ദര്‍ശിക്കാം. നിങ്ങളുടെ ലൊക്കേഷന്‍ തിരഞ്ഞെടുത്ത ശേഷം ഇന്ത്യന്‍ മൊബൈല്‍ നമ്പര്‍ നല്‍കി അപ്പോയിന്റ്മെന്റ് സ്ലോട്ട് ബുക്ക് ചെയ്യാവുന്നതാണ്. ബുക്ക് ചെയ്യുന്ന സമയത്ത് ഇന്ത്യയില്‍ ഉണ്ടായിരിക്കണമെന്ന് നിര്‍ബന്ധമില്ല. എന്നാല്‍ അപ്പോയിന്റ്മെന്റ് എടുത്ത തീതയില്‍ നേരിട്ട് ഹാജരാവേണ്ടിവരും. ഓഫ്‌ലൈന്‍ അപ്പോയിന്റ്മെന്റ് ഓഫ്‌ലൈനായി ആധാര് കേന്ദ്രം സന്ദര്‍ശിച്ച് ബയോമെട്രിക് അപ്പോയിന്റ്മെന്റ് എടുക്കുകയും ചെയ്യാം. യുഐഡിഎഐ എന്റോള്‍മെന്റ് സെന്റര്‍ സന്ദര്‍ശിക്കുമ്പോള്‍ ആവശ്യമായ എല്ലാ രേഖകളും സമര്‍പ്പിക്കേണ്ടതുണ്ട്. ഈ സമയത്ത് അപേക്ഷകന്റെ ഫോട്ടോ പകര്‍ത്തുകയും വിരലുകളുടെയും കണ്ണുകളുടെയും സ്‌കാനിങ് നടത്തുകയും ചെയ്യും. ആധാര് എപ്പോള്‍ ലഭിക്കും
ഇന്ത്യയിലെ രജിസ്റ്റര്‍ ചെയ്ത വിലാസത്തിലേക്കാണ് ആധാര് അയച്ചുനല്‍കുക. 90 ദിവസത്തിനുള്ളില്‍ ഇത് ലഭ്യമാവും. ആവശ്യമായ രേഖകള്‍ഐഡന്റിറ്റിയുടെയും വിലാസത്തിന്റെയും തെളിവായി സാധുവായ ഇന്ത്യന്‍ പാസ്‌പോര്‍ട്ട് നല്‍കണം. സാധുവായ ഇന്ത്യന്‍ വിലാസ തെളിവിന്റെ അഭാവത്തില്‍, പാന്‍, യൂട്ടിലിറ്റി ബില്ലുകള്‍ പോലുള്ള മറ്റ് ഏതെങ്കിലും യുഐഡിഎഐ അഡ്രസ് പ്രൂഫ് രേഖകള്‍ സ്വീകരിക്കും. വിദേശത്തെ താമസത്തിന്റെ തെളിവായി സ്റ്റാമ്പ് ചെയ്ത വിസയുടെ ഫോട്ടോകോപ്പിയോ വിദേശത്തെ റെസിഡന്‍സി സ്റ്റാറ്റസിന്റെ മറ്റ് രേഖകളോ ആവശ്യപ്പെട്ടേക്കും. 2023 ഒക്ടോബര്‍ ഒന്നിനോ അതിനു ശേഷമോ ജനിച്ചവരുടെ ജനന സര്‍ട്ടിഫിക്കറ്റ്. എന്‍ആര്‍ഐ കുട്ടികള്‍ക്ക് ഐഡന്റിറ്റിയും വിലാസവും തെളിയിക്കാന്‍ സാധുവായ ഇന്ത്യന്‍ പാസ്‌പോര്‍ട്ട് മാത്രമാണ് തെളിവായി സ്വീകരിക്കുക.
Next Story
READ ON APP