ഇന്ത്യൻ വിദ്യാർഥി കാനഡയിൽ വെടിയേറ്റ് മരിച്ച നിലയിൽ, മൃതദേഹം കണ്ടത് ഔഡി കാറിനുള്ളിൽ

വാൻകോവർ: കാനഡയിലെ സൗത്ത് വാൻകോവറിൽ ഇന്ത്യൻ വിദ്യാ‍‍ർഥിയെ കാറിൽ വെടിയേറ്റ് മരിച്ച നിലയിൽ കണ്ടെത്തി. ഹരിയാന സ്വദേശി ചിരാഗ് ആന്റിൽ (24) ആണ് മരിച്ചത്. ഈസ്റ്റ് 55 അവന്യുവിൻ മെയിൻ റോഡിന് സമീപം ശനിയാഴ്ച രാത്രി 11 മണിയോടെയാണ് സംഭവം. വെടിയൊച്ച കേട്ട നാട്ടുകാരാണ് വിവരം പോലീസിനെ അറിയിച്ചത്. പോലീസ് എത്തിയപ്പോഴേക്കും ചിരാഗിനെ കാറിനുള്ളിൽ വെടിയേറ്റ് മരിച്ച നിലയിൽ കണ്ടെത്തുകയായിരുന്നു.

കാനഡ വെസ്റ്റിലെ യൂണിവേഴ്സിറ്റിയിൽനിന്ന് എംബിഎ പൂ‍ർത്തിയാക്കിയ ചിരാഗ് വർക്ക് പെർമിറ്റ് നേടിയിരുന്നു. 2022 സെപ്റ്റംബറിലാണ് വാൻകോവറിൽ എത്തിയത്. തൻ്റെ ഓഡി കാറുമായി പുറത്തേക്ക് പോയതായിരുന്നു ചിരാഗ്. ഇതിനു പിന്നാലെയാണ് കൊലപാതകം നടന്നത്. ചിരാഗിൻ്റെ കൊലപാതകത്തിൽ ഇന്ത്യൻ വിദേശകാര്യ മന്ത്രാലയത്തിൻ്റെ ഇടപെടൽ തേടി നാഷണൽ സ്റ്റുഡൻ്റ്സ് യൂണിയൻ ഓഫ് ഇന്ത്യ അധ്യക്ഷൻ വരുൺ ചൗധരി സോഷ്യൽ മീ‍ഡിയയിലൂടെ രംഗത്തെത്തി. സംഭവത്തിൻ്റെ അന്വേഷണം ഇന്ത്യൻ വിദേശകാര്യ മന്ത്രാലയം നിരീക്ഷിക്കണമെന്നും നീതി ലഭ്യമാക്കണമെന്നും വരുൺ ചൗധരി പറഞ്ഞു. കൊല്ലപ്പെട്ട വിദ്യാ‍‍ർഥിയുടെ കുടുംബത്തിന് സഹായം നൽകാൻ മന്ത്രാലയം തയ്യാറാകണമെന്നും വരുൺ ചൗധരി ആവശ്യപ്പെട്ടു.

സംഭവത്തിനു തൊട്ടുമുൻപ് വരെ ചിരാഗുമായി സംസാരിച്ചതായി ചിരാഗിൻ്റെ സഹോദരൻ രോമിത് ആൻ്റിൽ പറഞ്ഞു. സന്തോഷത്തോടെയായിരുന്നു ചിരാഗിൻ്റെ സംസാരം. പ്രശ്നങ്ങളൊന്നും ഉണ്ടായിരുന്നില്ലെന്നും രോമിത് ചൂണ്ടിക്കാട്ടി. സംഭവത്തിൽ അന്വേഷണം തുടരുകയാണെന്നും ആരെയും അറസ്റ്റ് ചെയ്തിട്ടില്ലെന്നും വാൻകോവ‍ർ പോലീസ് അറിയിച്ചു. അതേസമയം ചിരാഗിൻ്റെ മൃതദേഹം നാട്ടിലെത്തിക്കാനായി കുടുംബത്തിൻ്റെ നേതൃത്വത്തിൽ ക്രൗഡ്ഫണ്ടിങ് ക്യാംപയിൻ ആരംഭിച്ചതായാണ് റിപ്പോ‍ർട്ട്.