കെഎല് രാഹുല് കസറി; ചെന്നൈ സൂപ്പര് കിങ്സിനെതിരെ ലക്നോവിന് കൂറ്റന് ജയം

ക്യാപ്റ്റനും വിക്കറ്റ് കീപ്പര്‍ ബാറ്റ്‌സ്മാനുമായ കെഎല്‍ രാഹുല്‍ ഒറ്റയ്ക്ക് മുന്നില്‍നിന്ന് നയിച്ചതോടെ ലക്‌നോ സൂപ്പര്‍ ജയന്റ്‌സിന് കൂറ്റന്‍ വിജയം. ചെന്നൈ സൂപ്പര്‍ കിങ്‌സിനെതിരായ ഐപിഎല്‍ മല്‍സരത്തില്‍ എട്ടു വിക്കറ്റിനാണ് വിജയം.സ്‌കോര്‍: ചെന്നൈ സൂപ്പര്‍ കിങ്‌സ്- 20 ഓവറില്‍ ആറിന് 176.ലക്‌നോ സൂപ്പര്‍ ജയന്റ്‌സ്: 19 ഓവറില്‍ രണ്ടിന് 180.ലക്‌നോവിലെ എബി വാജ്‌പേയി സ്റ്റേഡിയത്തിലെ സ്വന്തം കാണികള്‍ക്ക് മുന്നില്‍ 177 റണ്‍സ് വിജയലക്ഷ്യവുമായി ബാറ്റിങ് ആരംഭിച്ച അവര്‍ ഒരു ഓവര്‍ ബാക്കിനില്‍ക്കെ ലക്ഷ്യത്തിലെത്തുകയായിരുന്നു.

രണ്ട് വിക്കറ്റ് മാത്രം നഷ്ടപ്പെടുത്തിയാണ് വിജയിച്ചത്.ഓപണര്‍മാരായ രാഹുലും ക്വിന്റ്റന്‍ കോക്കും ചേര്‍ന്നുണ്ടാക്കിയ 134 റണ്‍സിന്റെ ഒന്നാം വിക്കറ്റ് കൂട്ടുകെട്ടാണ് അനായാസ വിജയമൊരുക്കിയത്. രാഹുല്‍ 53 പന്തില്‍ 82 റണ്‍സെടുത്തു. മൂന്ന് സിക്‌സറുകളും ഒമ്പത് ബൗണ്ടറികളും അടിച്ച രാഹുല്‍ തന്നെയാണ് മാന്‍ ഓഫ് ദി മാച്ച്. ക്വിന്റ്റന്‍ കോക്ക് 54 (43) റണ്‍സെടുത്തു. നേരത്തെ ടോസ് നഷ്ടപ്പെട്ട് ബാറ്റിങ് ആരംഭിച്ച ചെന്നൈക്ക് രണ്ടാം ഒാവറിലെ ആദ്യ പന്തില്‍ തന്നെ രചിന്‍ രവീന്ദ്രയുടെ വിക്കറ്റ് നഷ്ടമായി.

റണ്‍സെടുക്കും മുമ്പെ മുഹ്‌സിന്‍ ഖാന്‍ കുറ്റി തെറിപ്പിച്ചു. 40 പന്തില്‍ 57 റണ്‍സെടുത്ത് പുറത്താവാതെ നിന്ന രവീന്ദ്ര ജഡേജയാണ് ചെന്നൈയുടെ ടോപ് സ്‌കോറര്‍. ഒമ്പത് പന്ത് നേരിട്ട് 28 റണ്‍സെടുത്ത എംഎസ് ധോണി തന്റെ പ്രഹരശേഷി ഒരിക്കല്‍ക്കൂടി ലോകത്തിന് കാണിച്ചുകൊടുത്തു. രണ്ട് സിക്‌സും മൂന്ന് ഫോറും നേടിയ താരം ഓവര്‍ തീരുന്നതു വരെ ക്രീസിലുണ്ടായിരുന്നു. ഓപണര്‍ അജന്‍ക്യ രഹാന 36 (24), മൊയീന്‍ അലി 30 (20) എന്നിവരാണ് കൂടുതല്‍ റണ്‍സ് നേടിയ മറ്റുള്ളവര്‍.