ക്രിസ്റ്റ്യാനോയുടെ അൽ നസറിലേക്ക് മാഞ്ചസ്റ്റർ സിറ്റി സൂപ്പർ താരം വരും? വമ്പൻ ട്രാൻസ്ഫർ നടക്കാൻ സാധ്യതകൾ തുറക്കുന്നു

സൗദി പ്രൊ ലീഗ് ക്ലബ്ബായ അൽ നസർ എഫ് സി (Al Nassr FC) വൻ നീക്കത്തിനു തയാറെടുക്കുന്നതായി റിപ്പോർട്ട്. 2023 ജനുവരി ഒന്നിന് പോർച്ചുഗൽ ഇതിഹാസമായ ക്രിസ്റ്റ്യാനോ റൊണാൾഡോ (Cristiano Ronaldo) എത്തിയതോടെയാണ് അൽ നസർ എഫ് സി ലോക ശ്രദ്ധയിലേക്ക് ഉയർന്നത്. ക്രിസ്റ്റ്യാനോ റൊണാൾഡോ അൽ നസറിലേക്ക് എത്തിയതോടെ കരിം ബെൻസെമ, എൻഗൊളൊ കാന്റെ, നെയ്മർ, സാദിയൊ മാനെ, റോബർട്ടോ ഫിർമിനൊ തുടങ്ങിയ സൂപ്പർ താരങ്ങളും സൗദി പ്രൊ ലീഗിലെ വിവിധ ക്ലബ്ബുകളിലേക്ക് എത്തി.

ക്രിസ്റ്റ്യാനോ റൊണാൾഡോക്ക് കളത്തിൽ പിന്തുണ നൽകാനായാണ് അൽ അലാമി ജർമൻ ബുണ്ടസ് ലിഗ ക്ലബ്ബായ ബയേൺ മ്യൂണിക്കിൽ നിന്ന് സാദിയൊ മാനെയെ എത്തിച്ചത്. സാദിയൊ മാനെ, എയ്മറിക് ലാപോർട്ടെ, മാഴ്സെലൊ ബ്രൊസോവിച്ച്, ടലിസ്ക, ക്രിസ്റ്റ്യാനോ റൊണാൾഡോ എന്നിവരെല്ലാം ഉണ്ടെങ്കിലും അൽ നസർ എഫ് സിക്ക് 2023 - 2024 സീസണിൽ കിരീടം ഒന്നും ലഭിച്ചില്ല. സൗദി പ്രൊ ലീഗിൽ നിലവിൽ രണ്ടാം സ്ഥാനത്താണ് അൽ അലാമി. എ എഫ് സി ചാംപ്യൻസ് ലീഗിന്റെ ക്വാർട്ടർ ഫൈനലിലും സൗദി സൂപ്പർ കപ്പിന്റെ സെമിയിലും അൽ അലാമി പുറത്തായി.

2024 - 2025 സീസണിനു മുൻപായി ഒരു സൂപ്പർ മധ്യനിര താരത്തെ എത്തിച്ച് ക്രിസ്റ്റ്യാനോ റൊണാൾഡോയ്ക്ക് കളത്തിൽ പിന്തുണ നൽകാനുള്ള ശ്രമത്തിലാണ് അൽ നസർ എഫ് സി എന്നാണ് ഇപ്പോൾ പുറത്ത് വരുന്ന വിവരം. ഇംഗ്ലീഷ് ക്ലബ്ബായ മാഞ്ചസ്റ്റർ സിറ്റി എഫ് സിയുടെ ബെൽജിയം സൂപ്പർ താരം കെവിൻ ഡി ബ്രൂയിനെയാണ് അൽ നസർ എഫ് സി നോട്ടം വെച്ചിരിക്കുന്നത്. 2025 ജൂൺ 30 വരെ മാഞ്ചസ്റ്റർ സിറ്റി എഫ് സിയുമായി കെവിൻ ഡി ബ്രൂയിന് കരാർ കാലാവധി ഉണ്ട്. അതേസമയം, കെവിൻ ഡി ബ്രൂയിനെ സ്വന്തമാക്കാൻ സാധിച്ചാൽ അൽ അലാമിക്ക് അത് വൻ നേട്ടമാകും.

അൽ നസറിന് ഒപ്പം മറ്റു ചില സൗദി ക്ലബ്ബുകളും ഡി ബ്രൂയിനായി രംഗത്ത് ഉണ്ടെന്നും റിപ്പോർട്ടുണ്ട്. അറ്റാക്കിങ് മിഡ്ഫീൽഡിൽ ഇത്രയും ഭാവനാ സമ്പന്നമായി കളിക്കുന്ന മറ്റൊരു താരം നിലവിൽ ലോകത്തിൽ ഇല്ല. പരിക്കിനെ തുടർന്ന് 2023 - 2024 സീസണിൽ ഏറെ നാൾ കെവിൻ ഡി ബ്രൂയിൻ വിശ്രമത്തിലായിരുന്നു. ഈ സീസണിൽ ആകെ 19 മത്സരങ്ങളിൽ മാത്രമാണ് ഈ ബെൽജിയം താരം കളത്തിൽ എത്തിയത്. 19 മത്സരങ്ങളിൽ നിന്ന് അഞ്ച് ഗോൾ നേടുകയും 14 ഗോളിന് അസിസ്റ്റ് നടത്തുകയും ചെയ്തു. 2015 ൽ വൂൾവ്‌സ്ബർഗിൽ നിന്നാണ് കെവിൻ ഡി ബ്രൂയിൻ ഇംഗ്ലീഷ് ക്ലബ്ബായ മാഞ്ചസ്റ്റർ സിറ്റിയിൽ എത്തിയത്.

ചെൽസി എഫ് സി, വെർഡർ ബെർമൻ എന്നീ ക്ലബ്ബുകൾക്കു വേണ്ടി പന്ത് തട്ടിയ ശേഷമായിരുന്നു താരം ജർമൻ ക്ലബ്ബായ വൂൾവ്‌സ്ബർഗിൽ 2014 ൽ എത്തിയത്. 32 കാരനായ താരം മാഞ്ചസ്റ്റർ സിറ്റിക്കു വേണ്ടി 375 മത്സരങ്ങളിൽ ബൂട്ട് അണിഞ്ഞു. 101 ഗോളും 166 അസിസ്റ്റും ഇതുവരെ നടത്തി. ചെൽസി എഫ് സിക്കു വേണ്ടിയാണ് ഏറ്റവും കുറച്ച് മത്സരം കളിച്ചത്, ഒൻപത്. 2010 മുതൽ ബെൽജിയം ദേശീയ ടീമിൻറെ ഭാഗമായ കെവിൻ ഡി ബ്രൂയിൻ 99 മത്സരങ്ങളിൽ നിന്ന് 26 ഗോളും 49 അസിസ്റ്റും ഇതുവരെ നടത്തി.