जगभरात कौतुक झालेला मराठी चित्रपट महाराष्ट्रात होणार प्रदर्शित; 'स्थळ' आल्यानंतर नेमकं काय होतं?
सुरज कांबळे, मुंबई: प्रादेशिक सिनेमा हा नेहमीच विविधांगी आशय आणि विषयांमुळे चर्चेत असतो. त्यातही बऱ्याचदा मराठी सिनेमा अग्रस्थानी असतो. यापूर्वी अनेक मराठी सिनेमांचं आंतरराष्ट्रीय चित्रपट महोत्सवात कौतुक झालं आहे. यात आता भर पडतेय जयंत सोमलकर दिग्दर्शित 'स्थळ' या सिनेमाची. परंपरेनुसार चालू असलेली लग्न जुळवण्याची पद्धत आणि या पद्धतीमुळे अनेकांची विशेषतः मुलींची होणारी गळचेपी हे सगळंच 'स्थळ' या चित्रपटात मांडण्यात आलंय.
पारंपरिक पद्धतीनं लग्न जुळवण्यासाठी होणारा 'कांदे पोह्या'चा कार्यक्रम एका महत्त्वाकांक्षी आणि शिक्षणाची आवड असणाऱ्या मुलींसाठी किती कठोर असू शकतो हे 'स्थळ' हा चित्रपट दाखवतो. २०२३पासून हा चित्रपट अनेक आंतरराष्ट्रीय चित्रपट महोत्सवात सहभागी होत आहे. टोरोंटो इंटरनॅशनल फिल्म फेस्टिव्हलमध्ये या सिनेमाला सर्वोत्कृष्ट टोरोंटो नेटपॅक अवॉर्ड मिळाला.
तर नुकत्याच झालेल्या न्यूयॉर्क फिल्म फेस्टिव्हलमध्ये अनेक दिग्गजांनी या सिनेमाचं कौतुक केलं. या सिनेमाची कथा डोंगरगाव या गावात घडते. सविता हे सिनेमातील मुख्य पात्र आहे. तिची शिक्षणाची आवड आणि चांगलं भवितव्य घडवण्याची तिची सुरू असलेली मेहनत याकडे दुर्लक्ष करून तिचे शेतकरी वडील तिच्या लग्नाचा घाट घालतात. बघायला आलेलं स्थळ तिच्या वर्ण आणि शारीरिक रचनेवरून तिला नाकारत असतं आणि त्यामुळे तिला विनाकारण अपमानाला सामोरं जावं लागतं अशी कथा असलेला हा चित्रपट एकाच वेळी अनेक सामाजिक प्रश्नांना हात घालतो.
सिनेमात ग्रामीण भागात घडणाऱ्या सत्य घटनांचं अवलोकन केलं आहे. त्याविषयी जयंत सोमलकर म्हणाले, "स्थळ' हा सिनेमा आपल्यातील प्रत्येकाच्या गावी घडतो. स्थळ आल्यानंतर एका स्त्रीच्या मनातील भावना काय असतील तसंच तिची स्वप्नं कशी उद्ध्वस्त होतात या सगळ्याचं चित्रण सिनेमात केलंय. सिनेमा ही एक भाषा असून त्यातून मांडलेल्या भावना प्रेक्षकांपर्यंत अधिक प्रकर्षानं पोहोचतात. म्हणूनच हा सिनेमा अनेक आंतरराष्ट्रीय चित्रपट महोत्सवात गौरवला गेला आहे. जगभर हा सिनेमा पोहोचला आहे; पण आता तो प्रदर्शित झाल्यावर त्याला महाराष्ट्रात कसा प्रतिसाद मिळेल हे पाहण्यासाठी आम्ही काम करतोय.'
Next Story
READ ON APP