'कान'मध्ये 'FTII'ची बाजी; दोन हजारांहून अधिक एंट्रीमधून या कन्नड लघुपटाची निवड

मुंबई टाइम्स टीम फिल्म अँड टेलिव्हिजन इन्स्टिट्यूटच्या टीव्ही विभागातून ‘सनफ्लॉव्हर्स वेअर द फर्स्ट वन्स टू नो’ या लघुपटानं ‘कान’मध्ये बाजी मारली आहे. चिदानंद नाईकनं या फिल्मचं दिग्दर्शन केलं असून, कथा, पटकथा आणि संवादही त्यानंच लिहिले आहेत.फ्रान्समध्ये १५ ते २४ मे दरम्यान हा फेस्टिव्हल होत असून, २३ तारखेला या लघुपटाचं स्क्रीनिंग होणार आहे.

जगभरातील फिल्म स्कूलमधील विद्यार्थ्यांच्या कलाकृतीला आंतरराष्ट्रीय स्तरावर व्यासपीठ देण्यासाठी ‘कान’ महोत्सवात ही स्पर्धा घेतली जाते. २ हजारांहून अधिक एंट्रीमधून १८ लघुपटांची ‘कान’साठी निवड झाली असून, त्यामध्ये ‘एफटीआयआय’च्या फिल्मचा समावेश आहे. भारतातून निवड झालेली ही एकमेव फिल्म ठरली आहे! ‘मी २०२०मध्ये ‘एफटीआयआय’मधून पदवी घेतली असून, २०२२पर्यंत कॅम्पसच्या संपर्कात होतो. फिल्मच्या सबमिशनविषयी विसरूनही गेलो. अचानक ‘कान’च्या व्यवस्थापनाकडून निवडीचा ई-मेल आला, तेव्हा कुणीतरी मस्करी करतंय की काय असं वाटलं; पण नंतर विश्वास बसला,’ असं चिदानंदनं सांगितलं.

‘सनफ्लॉव्हर्स वेअर द फर्स्ट वन्स टू नो’ ही एका ज्येष्ठ महिलेची कथा आहे. एके दिवशी ती गावात सकाळी आरवणारा कोंबडा चोरते आणि त्यामुळे गावात एकच गोंधळ उडतो. कोंबडा शोधण्यासाठी गावकरी एकेक शक्कल लढवत त्या महिलेच्या कुटुंबाला कसं हद्दपार करतात, हे यात दाखवण्यात आलंय. चिदानंदसोबत सूरज ठाकूर (सिनेमॅटोग्राफर), मनोज व्ही. (एडिटर), अभिषेक कदम (साऊंड), प्रवण खोत यांनीही फिल्मसाठी काम केलंय. फ्रान्सला स्वखर्चानं जावं लागत असल्यानं या फिल्मच्या टीमनं आर्थिक मदतीसाठी प्रयत्न सुरू केले आहेत.

पैशांअभावी ‘कान’ची सुवर्णसंधी गमावता कामा नये, असा त्यांचा मानस आहे. डॉक्टर-डिरेक्टर!चिदानंदनं ‘म्हैसूर मेडिकल कॉलेज’मधून एमबीबीएसचं शिक्षण घेतलं असून, चित्रपटांविषयी त्याला विशेष प्रेम आहे. ‘प्रसिद्ध दिग्दर्शक गिरीश कासारवल्ली यांचे प्रादेशिक आणि हॉलिवूडचे इतर सिनेमे पाहत मी लहानाचा मोठा झालो. शिक्षणासाठी वैद्यकीय क्षेत्र निवडलं; पण सिनेमाची आवड शांत बसू देत नव्हती, म्हणून ‘एफटीआयआय’मध्ये प्रवेश घेतला. कन्नड भाषा माझ्या अभिव्यक्तीचं माध्यम असून, मातृभाषेत सिनेमे करून या इंडस्ट्रीला आंतरराष्ट्रीय स्तरावर न्यायचंय,’ असं चिदानंदनं ‘मुंटा’ला सांगितलं.

मराठवाड्याचंही नाव मोठंआणखी एका चेहऱ्यानं ‘कान’मध्ये महाराष्ट्राचा ठसा उमटला आहे. ‘द शेमलेस’ या हिंदी चित्रपटाची ‘कान’ चित्रपट महोत्सवात निवड झाली आहे. या चित्रपटात धाराशीवचा अभिनेता रोहित कोकाटे मुख्य भूमिकेत आहे. बल्गेरियाचे दिग्दर्शक कॉन्स्टॅन्टिन बोयानोव्ह यांनी या चित्रपटाचं दिग्दर्शन केलंय. भावनाप्रधान कथानक असलेला ‘द शेमलेस’ चित्रपट उत्तर भारतात घडतो. कथानायिका नादिरासोबत रेणुका आणि देविका यांची वेश्यागृहातून सुटकेची ही कथा आहे.

ओमारा, किरण बी., अनसुया सेनगुप्ता, तन्मय धनानिया आणि मीता वसिष्ठ यांनी यात काम केलंय. रोहित खलनायक साकारतोय. ‘धाराशीव आणि पुण्यात महाविद्यालयीन आणि अभिनयाचं शिक्षण झालं. नाटकातून करिअरची सुरुवात केली. ‘जाऊ कहाँ बता ए दिल’मधील भूमिका पाहून बोयानोव्ह यांनी माझी निवड केली. ‘कान’मधला सहभाग ही माझ्यासाठी सुवर्णसंधी आहे,’ असं रोहितनं सांगितलं.