शाहू महाराज नाही तर मंडलिक वारसदार आहेत का? 'दत्तक' विधानावरुन संजय राऊत भडकले

मुंबई: आताचे शाहू महाराज हे खरे वारसदार नाहीत तर ते सुद्धा दत्तकच आहेत, असं वादग्रस्त वक्तव्य महायुतीचे उमेदवार संजय मंडलिक यांनी केलं होतं. त्यावरुन आता शिवसेनेचे ठाकरे गटाचे खासदार संजय राऊत यांनी मंडलिकांचा चांगलाच समाचार घेतला आहे. जर, शाहू महाराज वारसदार नाहीत, तर मंडलिक वारसदार आहेत का, असं म्हणत त्यांनी मंडलिकांवर हल्लाबोल केला.

राजकीय स्वार्थासाठी मंडलिक यांनी जी भाषा वापरली ती महाराष्ट्र सहन करणार नाही - संजय राऊत"शाहू महाराज हे वारसदार नाहीत तर संजय मंडलिक हे वारसदार आहेत का? ज्या मंडलिकांचे वडील सदाशिवराव मंडलिक हे शाहू महाराजांच्या जवळचे होते. शाहू-फुलेंचा विचार घेऊनच सदाशिवराव मंडलिक हे राजकारणात काम करत होते. कोल्हापूरची गादी ही शाहू महाराजांची गादी, छत्रपती शिवाजी महाराजांची गादी आहे. त्या गादीविषयी महाराष्ट्राला नेहमीच आदर आणि श्रद्धा आहे. या निवडणुकीत तुमच्या पायाखालची वाळू सरकतेय, हे म्हटल्यावर तुम्ही महाराष्ट्रातील श्रद्धास्थानांवर ज्याप्रकारे चिखलफेक करत आहेत.

ते लक्षण चांगलं नाही, शाहू महाराजांनी महाविकास आघाडीचे उमेदवार म्हणून जी भूमिका घेतलेली आहे, ते आधीपासून सामाजिक कार्यात आहेत, कोल्हापूरच्या घडामोडीत काम करत आहेत. अशावेळी राजकीय स्वार्थासाठी मंडलिक यांनी ही भाषा वापरावी हे महाराष्ट्र सहन करणार नाही", असं संजय राऊत म्हणाले. शाहू महाराज हे सुद्धा दत्तक आहेत - संजय मंडलिकआताचे शाहू महाराज हे कोल्हापूरचे आहेत का? ते खरे वारसदार नाहीत ते सुद्धा दत्तकच आलेले आहेत. त्यामुळे तुम्ही आणि ही कोल्हापूरची जनता खरी वारसदार आहे, असे वादग्रस्त वक्तव्य महायुतीचे उमेदवार संजय मंडलिक यांनी केलं होतं.

त्यावरुन आता राजकीय वर्तुळात वेगवेगळ्या प्रतिक्रिया उमटत आहेत. ते काल चंदगड तालुक्यातील नेसरी येथील जाहीर सभेमध्ये बोलत होते. तसेच माझे वडील सदाशिवराव मंडलिक साहेबांनी खऱ्या अर्थाने पुरोगामी विचार जपला आहे. मल्लाला हातच लावायचा नाही. मल्लाला टांगच मारायची नाही. मग ती कुस्ती कशी होणार, असेही संजय मंडलिक म्हणाले.कोल्हापूर लोकसभा मतदारसंघात महाविकास आघाडीकडून शाहू महाराज छत्रपती यांना उमेदवारी देण्यात आली आहे. तर महायुतीकडून संजय मंडलिक हे निवडणुकीच्या रिंगणात आहेत.