व्हेरॉक कप क्रिकेट स्पर्धेत दिलीप वेंगसरकर अकादमीला विजेतेपद

दिगंबर शिंगोटे : रुहुल्ला नदाफ, आदित्य कापरे यांच्या अष्टपैलू कामगिरीच्या जोरावर व्हेरॉक दिलीप वेंगसरकर अकादमीने सोळा वर्षांखालील गटाच्या व्हेरॉक कप क्रिकेट स्पर्धेत केडन्स अकादमीवर ७१ धावांनी मात केली आणि विजेतेपद पटकावले. वेंगसरकर अकादमीच्या मैदानावर ही लढत झाली. नाणेफेक जिंकून प्रथम फलंदाजी करताना वेंगसरकर अकादमीने निर्धारित ४५ षटकांत ७बाद २४३ धावा केल्या.

त्यात रुहुल्ला नदाफ, अभिषेक टोप्नो, आदित्य कापरे आणि श्रेयश शिवरकर यांनी मोलाचा वाटा उचलला. नदाफने ४८ चेंडूंत बारा चौकार आणि एका षटकारासह नाबाद ७५ धावांची खेळी केली. त्याला आदित्य कापरेने मोलाची साथ दिली. आदित्यने २६ चेंडूंत तीन चौकारांसह नाबाद २८ धावांची खेळी केली. नदाफ-आदित्य यांनी आठव्या विकेटसाठी ५१ चेंडूंत ८१ धावांची भागीदारी रचली. याशिवाय अभिषेक टोप्नोने ४८ चेंडूंत सहा चौकारांसह ३३ धावांचे योगदान दिले. प्रत्युत्तर देताना केडन्स अकादमीकडून नीलमेघ नागावकरने झुंज दिली.

मात्र, इतरांकडून त्याला म्हणावी अशी साथ लाभली नाही. केडन्स संघाचा डाव १७२ धावांत आटोपला. नीलमेघने ६२ चेंडूंत दहा चौकार आणि तीन षटकारांसह ८० धावांची खेळी केली. स्पर्धेचे पारितोषिक वितरण पिंपरी-चिंचवड महानगरपालिकेचे शहर अभियंता मकरंद निकम यांच्या हस्ते आणि भारताचे माजी कर्णधार दिलीप वेंगसरकर यांच्या प्रमुख उपस्थितीत झाले. या वेळी प्रशिक्षक चिंतामणी वैद्य, शादाब शेख, भूषण सूर्यवंशी, चंदन गंगावणे, प्रमोद लिमण, राहुल वेंगसरकर उपस्थित होते. डॉ. विजय पाटील यांनी सूत्रसंचालन केले."क्रिकेटमधील अनिश्चितता लक्षात घेता हार न मानता सामन्याचा निकाल लागेपर्यंत लढत राहणारे खेळाडूच आपल्या संघाला विजयी करू शकतात आणि असे गुण आत्मसात करणे खूप गरजेचे आहे.

त्याचबरोबर मेहनत, जिद्द आणि शिस्त ही त्रिसूत्री तुम्हाला यशाच्या शिखरावर घेऊन जाते," असे भारताचे माजी कर्णधार दिलीप वेंगसरकर यांनी सांगितले. संक्षिप्त धावफलक : दिलीप वेंगसरकर अकादमी - ४५ षटकांत ७ बाद २४३ (रुहुल्ला नदाफ नाबाद ७५, अभिषेक टोप्नो ३३, आदित्य कापरे नाबाद २८, श्रेयश शिवरकर २७, प्रज्वल मोरे २१, देव वेद १९, शौर्य पारखे २-३२, प्रसाद आंबले २-३६) वि. वि. केडन्स अकादमी - ४१.२ षटकांत सर्व बाद १७२ (नीलमेघ नागावकर ८०, आलोक लोढा ४-२४, आदित्य कापरे ३-२९, देव वेद २-२३, रुहुल्ला नदाफ १-२४).