Toxic Chemical: महत्वाचे! तुम्ही वापरत असलेल्या उत्पादनांमध्ये ही रसायने तर नाही ना? होऊ शकतो कर्करोग

Toxic Chemical In Product: भारतासह जगभरात कर्करोगाच्या रुग्णांची संख्या झपाट्याने वाढत आहे. नॅशनल सेंटर ऑफ डिसीज इन्फॉर्मेटिक्स अँड रिसर्चच्या 2024 च्या अहवालानुसार, 2022 मध्ये देशात कर्करोगाच्या 14 लाख नवीन रुग्णांची नोंद केली जाईल. दर नऊपैकी एक व्यक्ती कर्करोगाने (Cancer risk) ग्रस्त आहे.

धूम्रपान आणि मद्यपानामुळे हा धोका आणखी वाढतो आहे.

अलीकडेच, सिंगापूरने MDH आणि एव्हरेस्टच्या काही उत्पादनांवर कर्करोगाला कारणीभूत घटक असल्याचे सांगत बंदी घातली आहे. त्यामुळे जेव्हा तुम्ही कोणतेही उत्पादन खरेदी करणार असाल तेव्हा तुम्हाला त्यात वापरल्या जाणाऱ्या घटकांची माहिती असणे आवश्यक आहे. कारण बाजारात विविध प्रकारच्या उत्पादनांमध्ये वेगवेगळ्या रसायनांचा वापर केला जातो. हे उत्पादन बनविण्यासाठी कोणकोणते साहित्य आणि केमिकलचा वापर करण्यात आला याबद्दलची इत्यंभूत माहिती पॅकेज मागे तसेच QR कोडद्वारे दिलेली असते. पण आपण त्याकडे दुर्लक्ष करतो. त्यामुळे संभाव्य आजारांपासून बचाव करण्यासाठी, खरेदी करत असलेल्या उत्पादनामध्ये कोणकोणत्या घटकांचा वापर करण्यात आला आहे हे जाणून घेणे खूप गरजेचे आहे. जेणेकरून. कर्करोगाला कारणीभूत ठरणाऱ्या घटकांचा वापर त्यात केला गेला असेल तर ती गोष्ट टाळता येऊ शकते.

उत्पादनांमध्ये वापरण्यात येणाऱ्या हानिकारक 5 रसायनांची यादी पहा

कोल टार
कोल टार हे कोळसा प्रक्रियेदरम्यान तयार होणारे उप-उत्पादन आहे. हेअर डाई, शाम्पूसह अनेक त्वचेच्या उत्पादनांमध्ये याचा वापर केला जातो. जर तुम्ही नियमितपणे वापर करत असलेल्या तुमच्या शॅम्पूमध्ये याचा समावेश असल्यास, तुमच्यासाठी ही धोक्याची घंटा असू शकते. कारण याचा अतिवापर केल्याने फुफ्फुस, मूत्राशय आणि किडनीवरही विपरीत परिणाम होतो.

पॅराबेन
कॉस्मेटिक उत्पादने जास्त काळ टिकून राहण्यासाठी पॅराबेनचा वापर केला जातो. हे साबण, शैम्पू, शेव्हिंग क्रीम आणि प्रक्रिया केलेल्या उत्पादनामध्ये हे रसायन आढळते. पॅराबेन केमिकलचा मानवी हार्मोन्स आणि प्रजनन क्षमतेवर नकारात्मक परिणाम होतो. या केमिकलचे उत्पादन जास्त प्रमाणात वापरल्याने स्तनाच्या कर्करोग होण्याचा संभव अधिक असतो. त्यामुळे जेव्हा कधीही तुम्ही कोणतेही कॉस्मेटिक उत्पादने किंवा प्रक्रिया केलेले अन्न खरेदी करण्यासाठी बाजारात जाल तेव्हा खात्री पॅराबेन मुक्त असलेल्या वस्तूंचीच निवड करा.

फॅथलेट्स (phthalates)
परफ्यूम, हेअर स्प्रे आणि नेल पॉलिश यांसारख्या कृत्रिम सुगंधी उत्पादनांमध्ये फॅथलेट्स सारखी रसायने वापरली जातात. त्याचा तुमच्या हार्मोन्सवर वाईट परिणाम होतो. यामुळे स्तनाचा कर्करोग होण्याची शक्यता अधिक असते, त्यामुळे तुम्ही वापरत असलेल्या उत्पादनामध्ये या रसायनाचा वापर तर केलेला नाही ना, याची पाहणी करा.

फॉर्मल्डिहाइड
फॉर्मल्डिहाइड हा एकप्रकारचा रंगहीन गॅस आहे, ज्याचा तीव्र गंध येतो, जो बांधकाम साहित्य, ऑटोमोबाईल आणि कापड उद्योगांची उत्पादने तयार करण्यासाठी वापरला जातो. IARC (इंटरनॅशनल एजन्सी फॉर रिसर्च ऑन कॅन्सर) सारख्या संस्थांनी देखील हे मान्य केले आहे की यामुळे नासोफरीन्जियल कॅन्सर आणि ल्युकेमियासारखे आजार होऊ शकतात. त्यामुळे अशी उत्पादने खरेदी करताना, त्यामध्ये फॉर्मल्डिहाइड गॅसचा वापर केला आहे की नाही हे तपासणे देखील गरजेचे आहे.

ऍक्रिलामाइड (acrylamide)
उच्च तापमानात तळलेले किंवा बेक केलेल्या अन्नपदार्थांमध्ये ऍक्रिलामाइड नावाचे रसायन आढळते. ऍक्रिलामाइडचा प्राण्यांवरही विपरीत परिणाम होत असल्याचे अनेक अभ्यासातून समोर आले आहे. असे पदार्थ खाल्ल्याने माणसामध्ये कर्करोगाचा धोका वाढू शकतो.

एकंदरीत, आपण जे काही वस्तु किंवा उत्पादने दैनंदिन वापरासाठी खरेदी करतो, त्याची पूर्ण माहिती जाणून घेणे ग्राहक म्हणून आपले कर्तव्य आहे. शिवाय, प्रत्येक उत्पादनाच्या पॅकेटवर त्याच्या मॅन्युफॅक्चरिंगबद्दल सर्व माहिती दिलेली असते. ती माहिती तपासूनच त्याची खरेदी करणे योग्य ठरेल.