World Red Cross Day 2024: जागतिक रेड क्रॉस दिन का साजरा केला जातो ? इतिहास, महत्त्व आणि थीम जाणून घ्या

World Red Cross Day 2024: दरवर्षी 8 मे हा हेन्री डुनांट (Henry Dunant) यांचा जन्मदिन जागतिक रेड क्रॉस दिन (World Red Cross Day) म्हणून साजरा केला जातो. जागतिक रेड क्रॉस दिनाला (World Red Cross Day 2024) रेड क्रीसेंट डे असेही म्हटले जाते. रेड क्रॉसच्या आंतरराष्ट्रीय समितीचे संस्थापक हेन्री डुनांट हे नोबेल शांतता पुरस्कार मिळवणारे पहिले व्यक्ती होते.

त्यांच्या जन्मदिनी रेड क्रॉस दिन साजरा करण्यामागे एक खास उद्देश आहे. रेड क्रॉस आणि रेड क्रीसेंट आंदोलनाच्या सिद्धांतांविषयी जागरुकता निर्माण करण्यासाठी हा दिवस साजरा केला जातो.

जागतिक रेड क्रॉस दिनाचा इतिहास (World Red Cross Day History)इटलीमध्ये 1859 मध्ये सॉल्फेरिनोची लढाई झाली. या लढाईमध्ये अनेक सैनिक जखमी झाले. तसेच अनेक सैनिक मृत्यूमुखी पडले. जखमी सैनिकांची काळजी घेण्यासाठी कोणत्याही सैन्याकडे फारशी वैद्यकीय सोय उपलब्ध नव्हती. हेन्री डुनांट यांनी स्वयंसेवकांचा एक गट तयार केला. या स्वयंसेवकांनी युद्धात जखमी झालेल्या सैनिकांसाठी अन्न आणि पाणी आणले. या गटाने सैनिकांवर उपचार केल्यानंतर त्यांच्या कुटुंबियांना पत्रेदेखील लिहिली. पुढे मग तीन वर्षांनी हेन्री यांनी आपला अनुभव 'अ मेमरी ऑफ सॉल्फेरिनो' या पुस्तकाच्या स्वरूपात जगासमोर मांडला. या पुस्तकात त्यांनी कायमस्वरूपी आंतरराष्ट्रीय समाज स्थापन करण्याविषयी भाष्य केले होते. युद्धात जखमी झालेल्यांवर उपचार करू शकणाऱ्या लोकांचा एक समाज/ संस्था त्यांना तयार करायची होती. मानवता आधारित तत्वतांवर या संस्थेचे काम चालावे अशी हेन्री यांची इच्छा होती. त्यांच्या या सूचनेची एक वर्षाने अंमलबजावणी झाली. इंटरनॅशनल फेडरेशन ऑफ रेड क्रॉस अँड रेड क्रीसेंट सोसायटीजची निर्मिती झाली. त्यानंतर 1984 पासून जागतिक रेड क्रॉस दिन साजरा करायला सुरुवात झाली.

जागतिक रेड क्रॉस दिनाचे महत्व (World Red Cross Day Significance)जागतिक रेड क्रॉस दिनाचा उद्देश जागतिक पातळीवर रेड क्रॉस आणि रेड क्रीसेंट चळवळीद्वारे करण्यात आलेल्या कामाचा सन्मान करणे हा आहे. रेड क्रॉस संघटनेद्वारे लोकांमध्ये त्यांच्या सिद्धांताविषयी आणि मोहिमेविषयी जागरुकता निर्माण केली जाते. संकटाच्या वेळी माणुसकी, करुणा आणि एकतेचे महत्त्व पटवून देण्यासाठी प्रयत्न केले जातात. समाजसेवेसाठी ,माणुसकी जपण्यासाठी रेड क्रॉस चळवळीतर्फे केल्या जाणाऱ्या कामाचे महत्त्व या दिवशी सांगितले जाते.

जागतिक रेड क्रॉस दिनाचा उत्सव (World Red Cross Day Celebration)जागतिक रेड क्रॉस दिनाला म्हणजेच 8 मे या दिवशी राष्ट्रीय रेड क्रॉस आणि रेड क्रिसेंट सोसायटी, इंटरनेशनल फेडरेशन ऑफ रेड क्रॉस अँड रेड क्रिसेंट सोसायटीज (IFRC) आणि ICRC तर्फे विविध कार्यक्रमांचे आयोजन केले जाते. या दिवशी प्राथमिक तपासणी शिबीर, रक्तदान शिबीर आणि जनजागृती अभियान इत्यादी कार्यक्रमांचे आयोजन केले जाते.

जागतिक रेड क्रॉस दिनाची थीम ( World Red Cross Day 2024 Theme)'मी आनंदाने आनंद पसरवतो आणि जो आनंद मी देतो तोच आनंद माझ्यासाठी बक्षीस आहे',(I give with joy, and the joy I give is a reward) अशी जागतिक रेड क्रॉस दिनाची 2024 ची थीम आहे. प्रेमाने लोकांसाठी काम करत राहावे, हा रेड क्रॉसचा या थीममागचा उद्देश आहे.