चीनमध्ये मेटाला झटका, Apple ने स्टोरवरुन काढून टाकले WhatsApp आणि Threads

Apple news: ॲपलने चीनमधील आपल्या ॲप स्टोअरमधून दोन लोकप्रिय मेटा ॲप काढून टाकले आहेत. Apple ने चीनमधील आपल्या ॲप स्टोअरमधून WhatsApp आणि थ्रेड्स काढून टाकले आहे. चीनच्या सायबरस्पेस प्रशासनाने त्यांच्या राष्ट्रीय सुरक्षेच्या कारणास्तव हे ॲप्स चीनच्या स्टोअरफ्रंटवरून काढून टाकण्याचे आदेश दिले.

त्यानुसार ही कारवाई करण्यात आली आहे. मेटाच्या मालकीचे हे दोन्ही ॲप्स चीनमध्ये आधीपासूनच ब्लॉक करण्यात आले होते तसेच त्याचा वापरही मोठ्या प्रमाणात कमी झाला होता. याबाबतचे वृत्त रॉयटर्सने दिले आहे.

ॲप स्टोअरमधून WhatsApp आणि Threads ॲपलने काढून टाकले आहेत. ॲपलने रॉयटर्सला दिलेल्या एका निवेदनात सांगितले की, “चीनच्या सायबरस्पेस प्रशासनाने त्यांच्या राष्ट्रीय सुरक्षेच्या कारणास्तव हे ॲप्स चीनच्या स्टोअरफ्रंटवरून काढून टाकण्याचे आदेश दिले आहेत. प्रशासनाच्या या निर्णयाबद्दल आम्ही असहमत होतो, मात्र आम्ही ज्या देशांत काम करतो तेथील कायद्यांचे पालन करणे बंधनकारक आहे. हे ॲप्स इतर सर्व स्टोअरफ्रंट्सवर डाउनलोड करण्यासाठी उपलब्ध आहेत असे ॲपलने सांगितले.

2020 मध्ये 1.2 लाख गेम काढून टाकले
चीनने हे दोन विशिष्ट ॲप्स काढून टाकण्यास का सांगितले हे स्पष्ट नाही. चीनमधील ॲप स्टोअरवर मेटाचे फेसबुक, इन्स्टाग्राम, मेसेंजर अजूनही युजर्ससाठी उपलब्ध आहेत. अहवालानुसार, YouTube आणि X सारखे इतर ॲप्स देखील डाउनलोडसाठी उपलब्ध आहेत. चीन किंवा मेटा या दोघांनीही या प्रकरणावर कोणतीही प्रतिक्रिया अद्याप दिलेली नाही. गेल्या चार वर्षांत ॲपलने चीनमधील आपल्या ॲप स्टोअरमधून हजारो ॲप काढून टाकले आहेत. 2020 मध्ये Apple ने ॲप स्टोअरवरुन तब्बल 1.2 लाख गेम काढून टाकले. 2023 मध्ये Apple ने 100 हून अधिक ॲप्स बंद केले जे ChatGPT सारखे आहेत. चीनमध्ये बेकायदेशीर मानल्या गेलेल्या सामग्रीचा समावेश होत होता या कारणाने ते ॲप्स काढून टाकण्यात आले.

Apple साठी चीन महत्त्वाची बाजारपेठ
चीनचे इंटरनेटवरील नियंत्रण सर्वज्ञात आहे. देशाच्या काही धोरणांमुळे काही लोकप्रिय ॲप्स चीन देशात काम करत नाहीत. उदाहरणार्थ, 2009 पासून Facebook चीनमध्ये ब्लॉक करण्यात आले आहे. तसेच 2023 मध्ये लॉन्च केलेले थ्रेड्स उपलब्ध आहेत किंवा ऍपलने काढून टाकेपर्यंत किमान आयफोनवर उपलब्ध होते. देशात जवळपास सात वर्षांपासून व्हॉट्सॲप ब्लॉक आहे. ॲप स्टोअरमधून ॲप्स काढून टाकल्यानंतर चीनमधील आयफोन युजर्स ते अजिबात डाउनलोड करू शकणार नाहीत. Apple साठी चीन हे एक प्रमुख उत्पादन केंद्र असण्यासोबतच महत्त्वाची बाजारपेठ आहे. चीन देश अमेरिकेच्या नंतर सर्वात मोठी बाजारपेठ आहे. विक्रीला चालना देण्यासाठी कंपनी आयफोन उत्पादनांवर देशात जबरदस्त डिस्काउंट देत आहे.