ఆ స్వార్థంతో ఆమెను సంప్రదించాను.. వరలక్ష్మీపై దర్శకుడి కామెంట్

వరలక్ష్మీ శరత్ కుమార్ ఓ పాత్రను ఒప్పుకున్నా, సినిమాను అంగీకరించినా కూడా అందులో ఏదో ఒక యూనిక్ పాయింట్, కొత్తదనం ఉంటుందని ఆడియెన్స్ అంచనాలు పెంచుకుంటున్నారు. రీసెంట్‌గా అంటే హనుమాన్ మూవీతో వరలక్ష్మీ మరోసారి తన సత్తాను చాటుకుంది. తెలుగులో ఆమె ఎక్కువగా నెగెటివ్ రోల్స్ వచ్చాయి. ఇప్పుడు ఆమె శబరి అంటూ హీరోయిన్‌గా అందరినీ పలకరించబోతోంది.

మహర్షి కూండ్ల సమర్పణలో మహా మూవీస్ పతాకంపై మహేంద్రనాథ్ కూండ్ల ఈ చిత్రాన్ని నిర్మించగా.. అనిల్ కాట్జ్ దర్శకుడిగా పరిచయం కాబోతోన్నాడు. ఈ మూవీ మే 3న విడుదల కాబోతోంది.ఈ క్రమంలో దర్శకుడు అనిల్ మీడియాతో ముచ్చటించాడు. స్త్రీ ప్రధాన పాత్రల్లో చేయగల సత్తా ఉన్న ఆరిస్టులు ఇండియాలో కొంత మందే ఉన్నారని అన్నాడు. లీడ్ రోల్‌లో వేరియేషన్స్ అన్నింటినీ పండించగల ఆర్టిస్ట్ ఎవరున్నారని చూస్తే వరలక్ష్మీ శరత్ కుమార్ కనిపించారని చెప్పుకొచ్చాడు. ఆమె విలన్‌గా నటించిన 'పందెం కోడి 2', 'తార తప్పటై', 'సర్కార్'అలానే 'విక్రమ్ వేద' మూవీస్‌లో అద్భుతంగా నటించిందని అన్నాడు.

ఆవిడ ఇంటర్వ్యూలు చూశానని, ఆఫ్ స్క్రీన్ క్యారెక్టరైజేషన్ నచ్చిందని చెప్పుకొచ్చాడు. మనం కథలో చెప్పాలనుకున్న విషయాలను ఆరిస్టులు నమ్ముతున్నారా? లేదా? అనేది చాలా ఇంపార్టెంట్ అని అన్నాడు. అలా వాళ్లు నమ్మితేనే ముఖంలో కనిపిస్తుందని, అదే సినిమాకు హెల్ప్ అవుతుందని చెప్పుకొచ్చాడు. దర్శకుడిగా ఆ స్వార్థంతో ఆవిడను సంప్రదించాననని,చెన్నైలో కథ చెప్పినప్పుడు సింగిల్ సిట్టింగ్‌లో ఓకే చేసిందని, పెద్ద మార్పులు చేర్పులు కూడా చెప్పలేదన్నాడు. వరలక్ష్మి డైరెక్టర్స్ ఆర్టిస్ట్ అని, ఆమె డైరెక్షన్ డిపార్ట్మెంట్‌లో పని చేశారు కనుక కెమెరా, షాట్స్ గురించి అవగాహన ఉంటుందని, ఆమెకు సీన్ల గురించి ఎక్కువ వివరించాల్సిన అవసరం రాలేదని చెప్పుకొచ్చాడు.