వందల కోట్ల ఆస్తుల గుట్టు దాచి.. కొడుకుని సామాన్యుడిలా పెంచిన కోటీశ్వరుడు!

తమకు వందల కోట్ల రూపాయల ఆస్తులు ఉన్న విషయం దాచిపెట్టి.. కొడుకును సామాన్యుడిలా పెంచాడు ఓ తండ్రి. కొడుక్కి 20 ఏళ్ల వరకూ ఆ రహస్యాన్ని దాచిపెట్టి.. ఇటీవలే సంపద గురించి కొడుక్కి తెలియజేశాడు. ఆయనే చైనాకు చెందిన మాలా ప్రిన్స్ బ్రాండ్ వ్యవస్థాపకుడు జాంగ్ యుడాంగ్. రూ. 690 కోట్ల వార్షిక టర్నోవర్ కలిగిన మాలా ప్రిన్స్.. చైనాలో ప్రముఖ వ్యాపార సంస్థల్లో ఒకటి.

ఇటీవల జాంగ్ యుడాంగ్ కుమారుడు జాంగ్ జిలాంగ్ మీడియాతో మాట్లాడుతూ.. విస్తుగొలిపే విషయాలను వెల్లడించారు. తమ కుటుంబ ఆర్ధిక పరిస్థితి గురించి 20 ఏళ్ల వచ్చే వరకూ తనకు తండ్రి అబద్దం చెప్పారని అన్నాడు.‘నాకు 20 ఏళ్లు వచ్చేవరకు మా కుటుంబ ఆర్థిక పరిస్థితి గురించి మా నాన్న నిజం చెప్పలేదు.. ఆయన స్థాపించిన మాలా ప్రిన్స్ బ్రాండ్ గురించి తెలిసినప్పటికీ, వ్యాపారం నష్టాల్లో ఉందని తరచూ అబద్దం చెప్పేవారు. పింగ్‌జియాంగ్ కౌంటీలోని ఒక మధ్యతరగతి ఇంట్లో పెరిగాను.. కుటుంబం పేరు వాడుకోకుండా ప్రముఖ విద్యా సంస్థలో ప్రవేశం పొంది విద్యాభ్యాసం పూర్తిచేశాను.

గ్రాడ్యుయేషన్ తర్వాత నెలకు 800 డాలర్ల వేతనంతో మంచి ఉద్యోగం సంపాదించి అప్పులు తీర్చాలని భావించాను... అయితే ఆ సమయంలో మాకున్న ఆస్తుల గురించి నాన్న రహ్యం బయటపెట్టారు’ అని తెలిపారు. సంపద గురించి రహస్యం బయటపెట్టిన తర్వాతే జాంగ్ కుటుంబం రూ.11 కోట్ల ఖరీదైన విల్లాలోకి మారింది. సాధారణ వ్యక్తిగా పెరిగితేనే.. జీవితంలో విజయం సాధించడం కోసం కష్టపడి పనిచేస్తారనేది యుడాంగ్ అభిప్రాయం. తన కుమారుడి పెంపకంలోనే ఆయన అదే సూత్రాన్ని అనుసరించారు. ఇక, వందల కోట్ల ఆస్తుల గురించి చెప్పినా..

సంస్థ బాధ్యతలు అప్పగించే విషయంలో కొడుక్కి కొన్ని షరతులు విధించారు. సమర్ధతను నిరూపించుకోవాల్సిందేనని ఆయన తెగేసి చెప్పడం మరో విశేషం. మాలా ప్రిన్స్‌ ఈ కామర్స్ విభాగంలో పనిచేస్తున్న జాంగ్.. తన పనితీరు నచ్చితేనే కంపెనీ బాధ్యతలు కట్టబెట్టడం గురించి తన తండ్రి ఆలోచిస్తానని చెప్పినట్లు తెలిపారు. కాగా, స్ఫూర్తినిచ్చే ఈ స్టోరీ ప్రస్తుతం సోషల్ మీడియాలో వైరల్‌ అవుతోంది. దీనిపై నెటిజన్లు భిన్నాభిప్రాయాలు వ్యక్తం చేస్తున్నారు. ఇదంతా నమ్మశక్యంగా లేదని, కల్పితంలా ఉందని ఒకరంటే..

‘నేను ఈ కథను నమ్ముతున్నాను. ఈ బ్రాండ్ ఇటీవలి కాలంలోనే ప్రకటన ఇవ్వడం ప్రారంభించింది. ప్రిన్స్ గ్రాడ్యుయేట్ పూర్తికావడం వల్లేనేమో’ అని మరొకరు అన్నారు. వందల కోట్లు ఉన్న విషయం తెలిస్తే కొడుక్కి బాధ్యత తెలియదని భావించారని కొందరు ప్రశంసిస్తున్నారు.