Swipe to read next story
NewsPoint

ಒಂದೇ ವಿಮಾನದಲ್ಲಿ ಶಾ-ಎಚ್‌ಡಿಕೆ: ಸಿಎಂ ಡೌಟ್‌

Send Push
Vijay Karnataka
30th April, 2018 05:00 IST

ಬೆಳಗಾವಿ/ವಿಜಯಪುರ/ಬೆಂಗಳೂರು : ''ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಅಮಿತ್‌ ಶಾ ಮತ್ತು ಜೆಡಿಎಸ್‌ ರಾಜ್ಯಾಧ್ಯಕ್ಷ ಎಚ್‌.ಡಿ. ಕುಮಾರಸ್ವಾಮಿ ಒಂದೇ ವಿಮಾನದಲ್ಲಿ ದಿಲ್ಲಿಗೆ ಹೋಗಿದ್ದಾರೆ. ಸಮಯ ಬಂದಾಗ ಈ ಬಗ್ಗೆ ದಾಖಲೆ ಬಿಡುಗಡೆ ಮಾಡುತ್ತೇನೆ,'' ಎಂಬ ಸಿಎಂ ಸಿದ್ದರಾಮಯ್ಯ ಅವರ ಹೇಳಿಕೆ ಚುನಾವಣೆ ಹೊಸ್ತಿಲಲ್ಲಿ ಬಿಸಿಬಿಸಿ ವಾಗ್ವಾದಕ್ಕೆ ಕಾರಣವಾಗಿದೆ.

ಸಿದ್ದರಾಮಯ್ಯ ಅವರ ಹೇಳಿಕೆಗೆ ಕಟು ಆಕ್ರೋಶ ವ್ಯಕ್ತಪಡಿಸಿರುವ ಬಿಜೆಪಿ ಮತ್ತು ಜೆಡಿಎಸ್‌ ''ಇದು ಅಲ್ಪಸಂಖ್ಯಾತರ ಮತಗಳ ಕ್ರೋಡೀಕರಣಕ್ಕಾಗಿ ಸಿದ್ದರಾಮಯ್ಯ ನಡೆಸುತ್ತಿರುವ ವ್ಯವಸ್ಥಿತ ಹುನ್ನಾರ,'' ಎಂದು ಪ್ರತಿಕ್ರಿಯಿಸಿವೆ. ಅಮಿತ್‌ ಶಾ ಹಾಗೂ ಕುಮಾರಸ್ವಾಮಿ ಭೇಟಿಯಾಗಿರುವ ಫೋಟೊ ಇದ್ದರೆ ಬಿಡುಗಡೆ ಮಾಡುವುದನ್ನು ಬಿಟ್ಟು ಮುಖ್ಯಮಂತ್ರಿ ಸಿದ್ದರಾಮಯ್ಯ ಹಿಟ್‌ ಆ್ಯಂಡ್‌ ರನ್‌ ರಾಜಕಾರಣ ಮಾಡುತ್ತಿದ್ದಾರೆ. ಅಪಪ್ರಚಾರ ನಡೆಸಿ ಜನರ ದಾರಿ ತಪ್ಪಿಸಲು ಸಿದ್ದರಾಮಯ್ಯ ಇಂಥ ಸುಳ್ಳು ಆರೋಪ ಮಾಡುತ್ತಿದ್ದಾರೆ,'' ಎಂದು ಸಂಸದೆ ಶೋಭಾ ಕರಂದ್ಲಾಜೆ ಆರೋಪಿಸಿದ್ದಾರೆ.

ಭಾನುವಾರ ನಗರದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಸಿದ್ದರಾಮಯ್ಯ ಬಿಜೆಪಿ ಮತ್ತು ಜೆಡಿಎಸ್‌ ಕೈ ಜೋಡಿಸಿವೆ ಎಂದು ಪ್ರತಿಪಾದಿಸಿದರು. ಬಳಿಕ ವಿಜಯಪುರದಲ್ಲಿ ಮಾತನಾಡಿದ ಸಿಎಂ ''ಜೆಡಿಎಸ್‌ ಹಾಗೂ ಬಿಜೆಪಿ ನಡುವೆ ಒಪ್ಪಂದವಾಗಿದ್ದು, ಜೆಡಿಎಸ್‌ಗೆ ಮತ ಹಾಕಿದರೆ ಅದು ಮೋದಿಗೆ ಮತ ಹಾಕಿದಂತೆ,'' ಎಂದು ಅಭಿಪ್ರಾಯಪಟ್ಟರು. ವಿಜಯಪುರ ಮತ್ತು ಬಾಗಲಕೋಟ ಜಿಲ್ಲೆಯಲ್ಲಿ ಭಾನುವಾರ ಚುನಾವಣೆ ಪ್ರಚಾರದುದ್ದಕ್ಕೂ ಸಿದ್ದರಾಮಯ್ಯ ಅವರ ಒಂದಂಶದ ಮಾತು 'ಬಿಜೆಪಿ-ಜೆಡಿಎಸ್‌' ಮೈತ್ರಿ ಕುರಿತ ಆರೋಪವೇ ಆಗಿತ್ತು.

''ಚಾಮುಂಡೇಶ್ವರಿ ಕ್ಷೇತ್ರದಲ್ಲಿ ಬಿಜೆಪಿಯವರು ಗ್ರಾಪಂ ಚುನಾವಣೆಯಲ್ಲೂ ಗೆಲ್ಲಲಾಗದ ಅಭ್ಯರ್ಥಿಯನ್ನು ಕಣಕ್ಕಿಳಿಸಿದ್ದಾರೆ. ಬಿಜೆಪಿ ಮತ್ತು ಜೆಡಿಎಸ್‌ ಶಾಮೀಲಾಗಿವೆ ಎಂಬುದು ಇದರರ್ಥ. ಬೇಕಾದರೆ ಅಮಿತ್‌ ಶಾ ಹಾಗೂ ಕುಮಾರಸ್ವಾಮಿ ಜತೆಯಾಗಿರುವ ಫೋಟೊ ಬಿಡುಗಡೆ ಮಾಡುತ್ತೇನೆ,'' ಎಂದರು. ಇಂಡಿಯಲ್ಲಿ ನಡೆದ ಪ್ರಚಾರ ಸಭೆಯಲ್ಲಿ ಮಾತನಾಡಿ ''ಜೆಡಿಎಸ್‌ ಮುಖಂಡರು ಮನೆ ಮುರುಕರು. ಇಂಡಿ, ಪಿರಿಯಾಪಟ್ಟಣ, ಹನೂರು ಸೇರಿದಂತೆ ಕೆಲ ಕಡೆ ಅವರಿಗೆ ಗೆಲ್ಲುವುದು ಮುಖ್ಯವಲ್ಲ. ಕಾಂಗ್ರೆಸ್‌ ಮತ ಒಡೆಯಲು ಅಸಮರ್ಥ ಅಭ್ಯರ್ಥಿಗಳನ್ನು ಕಣಕ್ಕಿಳಿಸಿದ್ದಾರೆ,'' ಎಂದು ವಾಗ್ದಾಳಿ ನಡೆಸಿದರು.

ಜೆಡಿಎಸ್‌ ಪಕ್ಷ ಬಿಜೆಪಿಯ ಬಿ ಟೀಮ್‌ ಇದ್ದಂತೆ. ಅಮಿತ್‌ ಶಾ, ಕುಮಾರಸ್ವಾಮಿ ಒಂದೇ ವಿಮಾನದಲ್ಲಿ ಹೋಗಿದ್ದರ ಬಗ್ಗೆ ನಮ್ಮ ಬಳಿ ದಾಖಲೆಯಿದೆ.

- ಸಿದ್ದರಾಮಯ್ಯ, ಸಿಎಂ

ಚುನಾವಣೆಯೆಂದರೆ ಯುದ್ಧ ಕಾಲವಿದ್ದಂತೆ. ದಾಖಲೆ ಬಿಡುಗಡೆಗೆ ಇದಕ್ಕಿಂತ ಸೂಕ್ತ ಸಮಯ ಬೇಕೆ? ಅಮಿತ್‌ ಶಾಗೆ ರಾಜ್ಯ ಸರಕಾರವೇ ಝಡ್‌ ಪ್ಲಸ್‌ ಭದ್ರತೆ ನೀಡುತ್ತಿದೆ. ಗುಪ್ತದಳವೂ ರಾಜ್ಯ ಸರಕಾರದ ಕೈಯಲ್ಲಿದೆ. ಶಾ ಕದ್ದುಮುಚ್ಚಿ ಎಲ್ಲಿಯೂ ಓಡಾಡುತ್ತಿಲ್ಲ. ಎಚ್‌ಡಿಕೆ ಭೇಟಿಯಾಗಿದ್ದರ ದಾಖಲೆಯಿದ್ದರೆ ಬಿಡುಗಡೆಗೆ ಸಿದ್ದರಾಮಯ್ಯ ಹಿಂದೇಟು ಹಾಕುವುದೇಕೆ? ಸಿಎಂ ಕ್ಷಮೆ ಕೇಳಬೇಕು.

- ಶೋಭಾ ಕರಂದ್ಲಾಜೆ, ಬಿಜೆಪಿ ಸಂಸದೆ


ಜೆಡಿಎಸ್‌ಗೆ ಬಹುಮತ ಬರುವ ವಿಶ್ವಾದ ನಮ್ಮದು. ನಮಗೆ ಬಹುಮತ ಬರಲಿ, ಬಿಡಲಿ ಸರಕಾರ ರಚಿಸುವುದು ನಾವೇ.

- ಎಚ್‌.ಡಿ. ದೇವೇಗೌಡ, ಜೆಡಿಎಸ್‌ ವರಿಷ್ಠ


To get the latest scoop and updates on NewsPoint
Download the app