ಶ್ರೀಮಂತ ಅಮೆರಿಕನ್‌ ಸಮಾಜಕ್ಕೆ ಸ್ವಾಗತ; ಡೊನಾಲ್ಡ್ ಟ್ರಂಪ್‌ ಗೋಲ್ಡ್‌ ಕಾರ್ಡ್‌ ಖರೀದಿಸುವವರು ಯಾರಪ್ಪ?

ಯುಎಸ್‌ ಗೋಲ್ಡ್‌ ಕಾರ್ಡ್ ಕುರಿತು ಮಾತನಾಡಿರುವ ಡೊನಾಲ್ಡ್ ಟ್ರಂಪ್, "ನನಗೆ ಮತ್ತು‌ ನನ್ನ ದೇಶಕ್ಕೆ ಇದು ತುಂಬಾ ರೋಮಾಂಚಕಾರಿ ನಿರ್ಧಾರ.ನಾವು ಇದೀಗ ಟ್ರಂಪ್ ಗೋಲ್ಡ್ ಕಾರ್ಡ್ ಪರಿಚಯಿಸಿದ್ದು, ಇದರಿಂದ ಬರುವ ಎಲ್ಲಾ ಆದಾಯ ಯುನೈಟೆಡ್ ಸ್ಟೇಟ್ಸ್ ಸರ್ಕಾರದ ಖಜಾನೆ ಸೇರಲಿದೆ. ಇದು ಅಸ್ತಿತ್ವದಲ್ಲಿರುವ ಗ್ರೀನ್ ಕಾರ್ಡ್‌ಗಿಂತ ದೊಡ್ಡ ಪ್ರಯೋಜನಗಳನ್ನು ಹೊಂದಿದೆ. ಕಂಪನಿಗಳು ಗೋಲ್ಡ್‌ ಕಾರ್ಡ್‌ ಖರೀದಿ ಮೂಲಕ ವಿದೇಶಿ ವ್ಯಕ್ತಿಯನ್ನು ಉಳಿಸಿಕೊಳ್ಳಲಿ ಸಾಧ್ಯವಾಗುತ್ತದೆ" ಎಂದು ಸ್ಪಷ್ಟಪಡಿಸಿದ್ದಾರೆ. ಶ್ರೀಮಂತ ಅಥವಾ ಹೆಚ್ಚು ಕೌಶಲ್ಯಪೂರ್ಣ ವಿದೇಶಿ ಪ್ರಜೆಗಳನ್ನು ಆಕರ್ಷಿಸಲು ವಿನ್ಯಾಸಗೊಳಿಸಲಾದ ಗೋಲ್ಡ್ ಕಾರ್ಡ್-ಶೈಲಿಯ ವೀಸಾ ಕಾರ್ಯಕ್ರಮ, ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಅವರ ಮಹತ್ವಾಕಾಂಕ್ಷಿ ವಲಸೆ ಯೋಜನೆಯಾಗಿದೆ. ಇದು ವಿದೇಶಿ ಶ್ರೀಮಂತ ವಲಸಿಗರಿಗೆ ಅಮೆರಿಕದ ಪೌರತ್ವ ಕೊಡುವ ಯೋಜನೆಯಾಗಿದೆ. ಯುಎಸ್‌ ಗೋಲ್ಡ್‌ ಕಾರ್ಡ್‌ ವೀಸಾ ಪ್ರಕ್ರಿಯೆ ತ್ವರಿತ ಗತಿಯನ್ನು ಹೊಂದಿದ್ದು, ಉನ್ನತ ಪ್ರತಿಭೆ ಮತ್ತು ಗಮನಾರ್ಹ ವಿದೇಶಿ ಹೂಡಿಕೆಯನ್ನು ಅಮೆರಿಕಕ್ಕೆ ತರುವ ವಿಶಾಲ ಉದ್ದೇಶವನ್ನು ಹೊಂದಿದೆ.